Bıyl Aqtaý portynan 6,8 mln tonna júk tasymaldandy

ASTANA. KAZINFORM — Aqtaýda TMD-da teńdesi joq áýe habyn qurý josparlanyp otyr.

Jobanyń ınvestıtsııalyq quny 1 mlrd dollar. Tolyǵyraq óńir ákimi Nurdáýlet Qılybaı aıtyp berdi. 

— Óńirde qurlyq, teńiz, áýe qozǵalysynyń barlyq túri jolǵa qoıylǵan. Jergilikti mańyzdaǵy avtomobıl joldarynyń 96%-y jaqsy jaǵdaıda. Bul respýblıka boıynsha joǵary kórsetkish. Bıyl aımaqta 215 shaqyrymdy qamtıtyn 12 avtomobıl jolyn salý jáne qaıta jańǵyrtý jumystary júrgizilýde. Mańǵystaý oblysynyń tranzıttik áleýeti zor. Jyl basynan beri Aqtaý, Quryq porttary jáne Soltústik termınal arqyly 6,8 mln tonna júk tasymaldanyp, ósim 3,5 paıyzdy kórsetti, — dedi Nurdáýlet Qılybaı óńirdiń áleýmettik-ekonomıkalyq damýy týraly esep bere turyp.

Ákimniń málimetinshe, búginde jeke ınvestor qarjysyna Quryq portynda «Sarja» kóp fýnktsıonaldy teńiz termınalynyń qurylysy júrip jatyr jáne termınal ishinara iske qosyldy.

— Aqtaýda iri áýe habyn qurý bastamasy da Úkimetten qoldaý tapty. TMD elderinde teńdesi joq jobanyń ınvestıtsııalyq quny 1 mlrd dollar. Áýe haby iske asqan jaǵdaıda Aqtaý — Ortalyq Azııadaǵy áýe júk tasymalynyń ortalyǵyna aınalady dep kútilýde. Sonymen qatar, óńirde qoǵamdyq kólikterdi jańǵyrtý máselesi erekshe nazarda. Aqtaý qalasyna 91 dana jolaýshy avtobýs satyp alynyp, nátıjesinde qala avtobýsynyń parki 100%-ǵa jańartyldy, — deıdi ol.

Buǵan deıin Mańǵystaý oblysynyń ákimi Nurdáýlet Qılybaı óńirde kadr turaqtamaý máselesine qatysty pikir bildirgen edi.