Bıyl aqmolalyq sharýalar 6,6 mln tonna rekordtyq astyq jınady

ASTANA. KAZINFORM – Aqmola oblysy bıyl aýyl sharýashylyǵy óniminen 1 trıllıon teńgeden astam paıda tapty, bul ótken jylmen salystyrǵanda 1,5 ese artyq. Bul týraly Aqmola oblysynyń ákimi Marat Ahmetjanov málim etti.

- Bıyl bizdiń oblys astyq jınaýda aıtarlyqtaı nátıjege qol jetkizip, eldiń negizgi astyq alqaby degen mártebesin dáleldedi. Bizdiń maqsat – aýyl sharýashylyǵy salasyn óńir ekonomıkasynyń basty draıverine aınaldyrý. Bıyl aýyl sharýashylyǵy óniminen 1 trıllıon teńgeden astam kiris tústi, bul ótken jylmen salystyrǵanda 1,5 ese artyq. Óńir dıqandary 6,6 mln tonna rekordtyq astyq jınady. Ár gektardan 14 tsentnerden astam astyq jınaldy. Astyqtyń 60 paıyzdan astamy taýarlyq sapasy joǵary bıdaı. Árıne, bul eń bastysy dıhandardyń qajyrly eńbekteri, memlekettik qoldaý men zamanaýı tehnologııalardy tıimdi ári ýaqtyly qoldaný nátıjesi -, dedi Marat Ahmetjanov Ortalyq kommýnıkatsııalar qyzmeti alańynda ótken baspasóz máslıhatynda.

Ákim usynǵan málimetke súıensek, óńirde bıyl 1 239 jańa tehnıka satyp alyndy, onyń ishinde 334 tehnıka jeńildetilgen lızıng baǵdarlamasy boıynsha alyndy. 

Odan ári oblys ákimi Aqmola oblysynyń elordany azyq-túlikpen qamtýdaǵy róline toqtaldy. 

- Elorda turǵyndarynyń sút óniminiń 50 paıyzdan astamyn, et óniminiń 30 paıyzyn, jumyrtqanyń 80 paıyzyn, kartoptyń 85 paıyzyn qamtyp otyrmyz. Naqty aıtqanda, astana turǵyndaryna kún saıyn 80 tonna et ónimderi, 320 tonna sút assortımenti, 700 myń jumyrtqa jáne 25 tonna un jetkiziledi. Astanany azyq-túlikpen qamtýǵa zor úles qosatyn birqatar kásiporyn bar. Aldaǵy ýaqytta olardyń sany arta túsedi, - deıdi M. Ahmetjanov.