Bıyl Aqmolada jasymyq óńdeý zaýyty iske qosylady
ASTANA. KAZINFORM — Aqmola oblysynda jasymyqty óńdeýge arnalǵan zamanaýı tseh salý jónindegi ınvestıtsııalyq joba júzege asyrylmaq. Joba agroónerkásiptik keshenniń óńdeý salasyn damytýǵa, qosylǵan quny joǵary ónim óndirý kólemin arttyrýǵa jáne óńirdiń eksporttyq áleýetin nyǵaıtýǵa baǵyttalǵan. Bul týraly AShM málim etti.
— Jobanyń jalpy ınvestıtsııa kólemi 1,3 mlrd teńgeni quraıdy. Qarjylandyrý kásiporynnyń menshikti qarajaty esebinen júzege asyrylmaq, — dep habarlady vedomstvodan.
Jańa óndiristik nysannyń qýattylyǵy saǵatyna 5 tonna ónim óńdeýge múmkindik beredi. Jobany iske asyrý aýyl sharýashylyǵy shıkizatyn óńdeý múmkindikterin edáýir keńeıtip, óndirilgen ónimdi tıimdi paıdalanýǵa jol ashady jáne óńirdegi agrobıznestiń damýyna qosymsha serpin beredi.
Óndiristik jelini iske qosý 2026 jyldyń qyrkúıek aıyna josparlanǵan.
Kásiporyndy odan ári damytý aıasynda syıymdylyǵy 14 myń tonna bolatyn zamanaýı kókónis saqtaý qoımasyn salý da kózdelgen. Nysandy paıdalanýǵa berý aldaǵy jylǵa josparlanyp otyr.
Aıta keteıik, Túrkııaǵa shamamen 227 myń tonna qazaqstandyq jasymyq eksporttaldy.
