Aqmola oblysynda rekordtyq kólemde astyq jınaldy

ASTANA. KAZINFORM — Osy maýsymda egin jınaý alqaby 300 myń gektarǵa ósip, 5,5 mıllıon gektar boldy. 

— Dıqandardyń eńbeginiń arqasynda dándi daqyldardyń rekordtyq ónimi jınaldy. Ortasha ónimdilik gektarynan 16,3 tsentnerdi qurap 7,6 mıllıon tonna astyq jınaldy. Jınalǵan astyqtyń 70 paıyzy joǵary sapaly ónim. Bizdiń jetistigimiz ishki naryqpen shektelmeıdi. Aqmola astyǵy joǵary sapaly ónim retinde jańa halyqaralyq naryqty baǵyndyryp jatyr. Jyl basynan beri alys jáne jaqyn shetelderge 3,5 mıllıon tonnadan astam astyq eksporttaldy, — dedi Aqmola oblysynyń ákimi Marat Ahmetjanov ortalyq kommýnıkatsııalar qyzmeti alańynda óńirdiń áleýmettik-ekonomıkalyq damý áleýeti týraly esep bere turyp.

Búginde Aqmola astyǵy Qytaı, Iran, Italııa, Belgııa, Shvetsııa, Latvııa, Ózbekstan, Tájikstan, Ázerbaıjan taǵy basqa elderge eksporttalyp jatyr. 

— Estonııanyń Mýga Greın Termınalymen memorandýmǵa qol qoıý nátıjesinde jalpy 209 myń tonna astyqty Italııaǵa, Belgııaǵa jáne Estonııaǵa eksporttaýǵa múmkindik týdy. Memleket basshysynyń tapsyrmasyn oryndaý aıasynda sońǵy eki jylda joǵary rentabeldi maıly daqyldar egisiniń aýmaǵy 2,5 ese ulǵaıyp, alǵash ret 500 myń gektardy qurady. Nátıjesinde, 600 myń tonnaǵa jýyq maıly daqyldar jınaldy, qosymsha 100 mlrd teńge aýyl sharýashylyǵy ónimin óndirýge múmkindik berdi. Mundaı ósimge memleket tarapynan kórsetilip jatqan úlken qoldaýdyń arqasynda qol jetkizdik. Bıyl agroónerkásip kesheni salasyna 250 mıllıard teńgeden astam qarajat bólindi. Osylaısha mıneraldy tyńaıtqyshtardy engizý kólemi úsh ese artty. Aýyl sharýashylyǵy tehnıkasyn jańartý maqsatynda quny 62 mlrd teńge bolatyn jańadan 1 600 birlik aýyl sharýashylyǵy tehnıkasy jeńildetilgen lızıngpen satyp alyndy, — dep tolyqtyrdy óńir basshysy.

Odan ári oblys ákimi óńirde mal sharýashylyǵynyń salasynyń damý qarqynyna toqtaldy. 

— Mal sharýashylyǵy salasynda da turaqty oń dınamıka baıqalady. Jalpy aýyl sharýashylyǵy janýarlarynyń sany (5%-ǵa) men mal ónimderi óndirisiniń kólemi artty (3%-ǵa). Bıyl 168,5 myń tonna et6 205 myń tonna sút, 574 mıllıon dana jumyrtqa óndirildi. Sondaı-aq, sút, sút ónimderi fermalaryn qurý jáne keńeıtý boıynsha jumystar jalǵasyp jatyr, 5 400 mal bas bar bes iri ferma iske qosyldy. Jyl sońyna deıin taǵy 1 200 maly bar eki sút fermasy iske qosylady. Qazir 12 400 basqa arnalǵan 8 sút fermasyn iske asyrý jumysy júrgizilip jatyr. Elordanyń azyq-túlik beldeýin qamtamasyz etý boıynsha jumysy jalǵasady. Oblysymyzdyń aýyl sharýashylyǵy taýar óndirýshileri 86 ınvestıtsııalyq jobany (963 mlrd. teńge) iske asyrý arqyly Astana turǵyndaryn azyq-túlikpen qamtý kólemin arttyrady, — deıdi Marat Ahmetjanov.

Aıta keteıik, Aqmola oblysynda astyqty tereń óńdeıtin alǵashqy zaýyt qurylysy bastaldy.