Bıyl aqyly avtojoldardan 72 mlrd teńge túsken — QazAvtoJol
ASTANA. KAZINFORM — Búginde aqyly avtojoldar qarajat jınaýdyń quraly ǵana emes, jol salasyn turaqty qarjylandyrýdyń tıimdi tetigine aınalyp otyr. Bul model joldardyń sapasyn arttyrýǵa jáne onyń deńgeıin turaqty ustap turýǵa múmkindik beredi. Eń mańyzdysy — munyń barlyǵy respýblıkalyq bıýdjetke qosymsha salmaq túsirmeı júzege asady. Bul týraly QazAvtoJol kompanııasy málim etti.
Kompanııanyń málimetinshe, aqyly joldar óz-ózin tolyqtaı qamtıtyn júıe. Óıtkeni mundaı joldardy kútip-ustaýǵa respýblıkalyq bıýdjetten qarjy bólinbeıdi. Joldy kútip ustaý men damytýǵa qajetti qarajat tek jol paıdalanýshylarynan túsken tólem esebinen qalyptasady.
Bul tásil qarjy aǵynynyń táýelsizdigin jáne turaqtylyǵyn qamtamasyz etedi. Al bul óz kezeginde joldaǵy qaýipsizdik pen qyzmet kórsetý sapasynyń joǵary deńgeıin saqtaýǵa aıryqsha mańyzdy.
Aqyly joldar — ózin-ózi qamtamasyz etetin zamanaýı model
Qazaqstan Respýblıkasynyń «Avtomobıl joldary týraly» Zańy men Úkimettiń № 744 qaýlysyna sáıkes, «QazAvtoJol» ulttyq operatory respýblıkalyq jáne halyqaralyq mańyzdaǵy aqyly jol ýchaskelerin kútip-ustaýdy jáne damytýdy júzege asyrady.
Aqyly joldardan jınalǵan barlyq qarajat jeke esepshotqa túsip, naqty baǵyttar boıynsha jumsalady:
— joldardy kútip-ustaý jáne jóndeý,
— tólem alý júıesin qamtamasyz etý,
— jol-paıdalaný tehnıkasyn jańartý,
— jol qaýipsizdigi men paıdalanýshylarǵa qolaıly jaǵdaı jasaý.
ıAǵnı júrgizýshi tólegen árbir teńge qaıtadan sol jolǵa qyzmet retinde oralady.
2024 jyldyń qorytyndysy
2024 jyly aqyly avtojoldardan túsken qarjy kólemi 53 mlrd teńgeni (QQS-pen) qurady. Bul qarajat jol ınfraqurylymynyń úzdiksiz jumysyn qamtamasyz etýge múmkindik berdi:
— aqyly ýchaskelerdi kútip-ustaý men tólem alý júıesin júrgizýge,
— 680 birlik jol-paıdalaný tehnıkasyn satyp alýdy qosa alǵanda, kapıtaldyq shyǵystarǵa,
— ózge de mindetti shyǵyndarǵa baǵyttaldy.
Sonymen qatar 383 mln teńge respýblıkalyq bıýdjetke aýdarylǵan.
Jyl boıy aýqymdy jumystar atqaryldy:
— 43 myń m2 astam aýdanda oıyqtar jóndeldi,
–17,6 myń shaqyrymda jol tańbalaryn jańartyldy,
— 29 myńǵa jýyq sıgnaldyq baǵansha ornatyldy,
— zamanaýı aqparattyq jáne jaryqtandyrylǵan belgilerdi jóndeldi,
— 2,3 mln tekshe metrden astam qar tazalaý jáne basqa da jumystar júrgizildi.
2025 jyldyń 10 aıynyń nátıjeleri: jelini keńeıtý jáne qyzmet sapasyn arttyrý
2025 jyldyń qańtar–qazan aılarynda 72 mlrd teńge (QQS-pen) tústi. Bul kórsetkish aqyly joldar jelisiniń 4 883 shaqyrym bolatyn 26 ýchaskege deıin keńeıýimen tyǵyz baılanysty.
Qarajattyń negizgi bóligi tómendegi baǵyttarǵa jumsaldy:
— joldardy jáne ınfraqurylymdy kútip-ustaý,
— kapıtaldyq shyǵyndar, sonyń ishinde 89 traktor satyp alý jáne taǵy 504 tehnıka birligin jetkizýge daıyndyq,
— ózge de qajetti shyǵyndar.
10 aıda oryndalǵan jumystardyń kólemi de edáýir:
–61,4 myń m2 aýdanda oıyqtar jóndeldi,
— 19,6 myń shaqyrymda jol tańbasy salyndy,
— 4 363 jol belgisi ornatyldy,
— 31,6 myń boılyq metr qorshaý jóndeldi,
— 417 myń shaqyrym joldy qardan tazartyldy.
Ashyqtyq pen baqylaý — senim negizi
«QazAvtoJol» ulttyq kompanııasynyń qyzmetin Bas prokýratýra, UQK, JAP, Іshki memlekettik aýdıt komıteti jáne basqa da memlekettik organdar turaqty baqylaýda ustaıdy. 2024 jyly Sybaılas jemqorlyqqa qarsy qyzmet pen Іshki memlekettik aýdıt komıteti tarapynan tekserýler júrgizildi.
Kompanııanyń qarjylyq eseptiligi jyl saıyn táýelsiz aýdıtten ótip, Qarjy mınıstrliginiń depozıtarııinde jáne resmı saıtta ashyq jarııalanady. Bul qarjynyń maqsatty ári tıimdi jumsalýyna tolyq aıqyndyq beredi.
Aqyly joldar: kólik ınfraqurylymynyń damýyna qosylǵan úles
Aqyly joldar — elimizdiń jol salasyn jańǵyrtýǵa múmkindik beretin zamanaýı tetik.
Olar:
— jol sapasynyń joǵary standartyn saqtaýǵa,
— qozǵalys qaýipsizdigin arttyrýǵa,
— logıstıkalyq baılanystardy jyldamdatýǵa,
— ınfraqurylymǵa ınvestıtsııa tartýǵa,
— respýblıkalyq bıýdjetke túsetin júktemeni azaıtýǵa yqpal etedi.
Joldyń árbir shaqyrymy, árbir jańa tehnıka, árbir ornatylǵan belgi — aqyly júıeniń nátıjeli jumysynyń kórinisi. Búgin de bul júıe elimizdiń jol jelisin jańǵyrtýdyń mańyzdy qozǵaýshy kúshi bolyp otyr.
Aıta keteıik, jaqynda QazAvtoJol kompanııasy qaýipsizdik erejelerin eske salyp, júrgizýshilerge úndeý jasady. Onda jolaýshylardy tasymaldaý kezinde júrgizýshilerdiń mobıldi qurylǵylarǵa alańdaýy jol qaýipsizdigine úlken qater tóndirip otyrǵany aıtyldy.
