Bıyl 962 shaqyrym kanaldy paıdalanýǵa berý josparlanyp otyr
ASTANA.KAZINFORM - Sý resýrstary jáne ırrıgatsııa mınıstrligi uzyndyǵy 4,6 myń shaqyrymnan asatyn sýarý kanaldaryn rekonstrýktsııalaý jáne jańǵyrtý jobalaryn júzege asyryp jatqanyn habarlady.
Osy jyldyń qorytyndysy boıynsha 962 shaqyrym kanaldy paıdalanýǵa berý josparlanǵan. Bul óz kezeginde 200 myń gektarǵa jýyq sýarmaly jerdiń sýmen qamtylýyn jaqsartýǵa múmkindik beredi.
Aıta keteıik, 2024-2025 jyldary mınıstrlik shamamen 1,5 myń shaqyrym sýarý kanalyn rekonstrýktsııalaý jáne jańǵyrtý jumystaryn aıaqtady. Máselen, 2026 jyldyń basynda Eýropalyq qaıta qurý jáne damý bankimen birlesip júzege asyrylǵan 46 joba tolyq aıaqtaldy.
Qazirgi ýaqytta taǵy 21 joba iske asyrylyp jatyr. Búginge deıin josparlanǵan 717 shaqyrymnyń 502 shaqyrymy rekonstrýktsııadan ótti. Islam damý bankiniń qoldaýymen júzege asyrylyp jatqan 9 joba aıasynda búginge deıin josparlanǵan 635 shaqyrymnyń shamamen 600 shaqyrymy qaıta jańǵyrtyldy.
Sonymen qatar bıyl Islam damý bankimen birlesken «Klımattyq ózgeristerge tózimdi sý resýrstaryn damytý» jobasy aıasynda 88 sýarý kanalyn rekonstrýktsııalaý boıynsha qurylys-montaj jumystary bastaldy. Elimizdiń ońtústik óńirlerinde jalpy uzyndyǵy 968 shaqyrymdy quraıtyn, 65 myń gektar sýarmaly alqapty qamtıtyn 103 sýarý kanalyn avtomattandyrý jumystary qolǵa alyndy.
- Budan bólek, buǵan deıin rekonstrýktsııadan ótken jalpy uzyndyǵy 1184 shaqyrym bolatyn 270 kanaldy avtomattandyrý jumystary júrgizilip jatyr. Sondaı-aq avtomattandyrý elementteri men sýdy esepke alýdyń zamanaýı júıelerin engizýdi kózdeıtin 264 sýarý kanalyn rekonstrýktsııalaý jobasy boıynsha jobalaý-smetalyq qujat ázirlenip jatyr. Sonymen qatar Qanysh Sátbaev atyndaǵy kanaldy jańǵyrtý jónindegi Jol kartasy aıasyndaǵy is-sharalar júrgizilip jatyr. Nysanda 19 sorǵy agregaty men 17 transformatordy aýystyrý kózdelgen, - dedi Sý resýrstary jáne ırrıgatsııa vıtse-mınıstri Jandos Sálimov.
Aıta keteıik, elimizde sýarý kanaldary jańa tehnologııamen betondalýy múmkin.
Túrkistan oblysynda 10 sý kanaly memleket menshigine qaıtaryldy.
