Bıyl 96 mektepti paıdalanýǵa berý josparlanyp otyr
ASTANA. KAZINFORM – Bilim berý salasynda júrgizilip jatqan jumystardyń basty maqsaty – qala men aýyl mektepteri arasyndaǵy alshaqtyqty azaıtý. Memleket basshysynyń tapsyrmasy aıasynda 2020 jyldan beri elimizde 1,2 myńnan astam mektep salyndy. Nátıjesinde 1 mln-nan astam jańa oqýshy orny ashyldy, bul úsh aýysymdy mektepter sanyn tórt esege qysqartýǵa múmkindik berdi. Bıyl taǵy 53 myń orynǵa arnalǵan 96 mektepti paıdalanýǵa berý josparlanyp otyr. Bul týraly Úkimettiń baspasóz qyzmeti habarlady.
Sonymen qatar qoldanystaǵy mektep ınfraqurylymyn jańǵyrtý jumystary júrip jatyr: aldaǵy úsh jyl ishinde 1,3 myń mektepti jańartý kózdelgen, onyń 820-sy aýyldyq eldi mekenderde ornalasqan. 2025 jyldan beri 215 mektep jańartyldy. Júrgizilip jatqan jumystar aıasynda pándik kabınetter, ashanalar, sport zaldary jáne qaýipsizdik júıeleri tolyq aýystyrylyp jatyr.
Bilim berý mazmuny da zaman talabyna saı jetildirilip jatyr. Oqý úderisine tsıfrlyq tehnologııalar keńinen engizilip, pándik daıyndyq kúsheıtildi, sondaı-aq erekshe bilim berýdi qajet etetin balalarǵa arnalǵan beıimdelgen baǵdarlamalar damydy. Pedagogterdiń kásibı biliktiligin arttyrýǵa erekshe kóńil bólinip keledi. Bul oqý oryndarynda árbir oqýshynyń qabiletin ashýǵa múmkindik beretin qolaıly ári qoldaýshy orta qalyptastyrýǵa jol ashady.
Mektepke deıingi tárbıe men oqytý bilim berý júıesindegi mańyzdy kezeń bolyp qala beredi. Dál osy kezeńde balanyń tulǵalyq damýynyń negizi qalanyp, qarym-qatynas daǵydylary qalyptasady jáne mektepke daıyndyq júrgiziledi. Osyǵan baılanysty memleket balabaqshalar men mektepaldy daıarlyqqa qoljetimdilikti dáıekti túrde keńeıtip keledi. Búgingi tańda respýblıka boıynsha 12 myńnan astam mektepke deıingi uıym jumys isteıdi. Onyń 5,3 myńy – memlekettik, al 6,6 myńy – jekemenshik uıymdar. Munda 1 mln-nan astam bala tárbıelenýde, 2-6 jas aralyǵyndaǵy balalardy mektepke deıingi bilimmen qamtý deńgeıi 70,9%-ǵa jetse, kezekte turǵan balalar arasynda bul kórsetkish 96%.
Mektepke deıingi bilim berýdiń qoljetimdiligin arttyrý úshin qarjylandyrýdyń jańa tásilderi engizilip jatyr. Atap aıtqanda, elimizdiń 20 qalasy men 23 aýdanynda vaýcherlik qarjylandyrýdyń pılottyq jobasy iske qosyldy. Jobaǵa 6 myńǵa jýyq uıym qatysyp, 936 myńnan astam vaýcher berildi. Bul qadam bıýdjet shyǵystarynyń ashyqtyǵy men tıimdiligin arttyryp qana qoımaı, balabaqshalardaǵy respýblıkalyq kezekti 2025 jyldan beri 9 esege derlik qysqartty. Nátıjesinde kezekte turǵan balalar sany 160 myńnan 18 myńǵa deıin azaıdy.
Sońǵy úsh jylda elimizde mektepke deıingi uıymdarda 223 myń jańa oryn ashyldy, al 2027 jyldyń sońyna deıin taǵy 76,5 myń oryn ashý josparlanyp otyr. Mektepke deıingi bilim berý úderisiniń sapasyn qamtamasyz etý isine 104 myńnan astam maman tartylǵan. Olar úshin erte jastaǵy balalardy damytý salasyndaǵy qamanaýı standarttarǵa sáıkes turaqty túrde biliktilikti arttyrý júıesi qalyptastyrylǵan.
Balabaqshalar jelisin keńeıtý, qarjylandyrýdyń jańa tásilderin engizý jáne muǵalimderge qoldaý kórsetý mektepke deıingi bilim berýdi qoljetimdi ári sapaly etýge septigin tıgizip otyr. Bul balalardy mektepke daıyndaýmen qatar olardyń erte jastan qaýipsiz, jan-jaqty damytýshy jáne qamqor ortada tárbıelenýine múmkindik beredi.
Aıta keteıik, Qazaqstanda 6,9 mıllıonnan astam balanyń quqyǵyn qorǵaýǵa 1,3 trln teńge bólindi.
