Bıyl 9 energoblok pen 55 qazandyqqa kúrdeli jóndeý júrgiziledi
ASTANA. KAZINFORM – Bıyl elektr stantsııalaryn jóndeýge 384 mlrd teńge jumsalady. Bul týraly Úkimet otyrysynda Energetıka vıtse-mınıstri Suńǵat Esimhanov aıtty.
- Aldaǵy jylytý maýsymyna daıyndyq aıasynda elektr stantsııalarynda bekitilgen kestege sáıkes, bıyl 9 energoblokty, 55 qazandyqty jáne 51 týrbınany kúrdeli jóndeý josparlanǵan. 4 energoblokta, 18 qazandyqta jáne 7 týrbınada jóndeý jumystary túrli kezeńderde júrgizilip keledi. 1 qazandyq pen 1 týrbınada jóndeý jumystary aıaqtaldy, - dedi vıtse-mınıstr.
Onyń dereginshe, elektr stantsııalarynda jóndeý jumystaryn qarjylandyrý 384 mlrd teńge deńgeıinde josparlanǵan. Bul ótken jylǵy deńgeıden 9 paıyzǵa joǵary.
- Elektr jelilerinde 1,2 myń shaqyrym elektr berý jelisi, 54 qosalqy stantsııa jóndeldi. Jylý jelileri boıynsha rekonstrýktsııalaý jáne jóndeý jospary 377 shaqyrymdy quraıdy. Jumystar gıdravlıkalyq jáne temperatýralyq synaqtar aıaqtalǵannan keıin bastalyp jatyr. Jóndeý jumystary grafık boıynsha júrgizilip jatyr. Búginde artta qalýshylyq joq. Atalǵan is-sharalardyń qorytyndysy boıynsha elektr stantsııalary boıynsha negizgi jabdyqtardyń tozýy - 52, elektr jelileri boıynsha – 65,7 jáne jylý jelileri boıynsha 48 paıyzǵa tómendeýi kútilýde, - dedi Suńǵat Esimhanov.
Buǵan deıin elimizdegi 5 jylý elektr ortalyǵy bıyl «qyzyl» aımaqtan shyǵarylatynyn jazǵan edik.
