Bıyl 9 aıda esirtkini jasyryn taratýmen aınalysqan 61 jasóspirim ustaldy

ASTANA. KAZINFORM — Bıyl 9 aıda esirtkini jasyryn taratýmen aınalysqan 61 jasóspirim ustaldy. Bul týraly ІІM Esirtki qylmysyna qarsy is-qımyl departamenti bastyǵynyń orynbasary Baqytjan Ámirhanov aıtty.

- 9 aıdyń qorytyndysynda kámeletke tolmaǵan 61 jasóspirim ustaldy. Ótken jylmen salystyrǵanda kórsetkish sál kópteý. Esirtkini jasyryn taratýmen aınalysqandardyń arasynda 40 kolledj stýdenti men 10 mektep oqýshysy bar, - dedi ol BAQ ókilderine bergen suhbatynda.

Onyń atap ótýinshe, esirtkini jasyryn taratqany úshin 16 jastan qylmystyq jaýapkershilik bar. Degenmen qoǵamda asa aýyr esirtki qylmysyn jasaǵan jasóspirimderdi 13 jastan bastap jaýapkershilikke tartý kerek degen pikir qalyptasyp otyr. Biraq mınıstrlik esirtki taratýshylardy qylmystyq jaýapkershilikke tartý jasyn tómendetýdi josparlap otyrǵan joq.

- Ótken jyly qylmystyq zańnamaǵa naqty túzetýler engizdik. Endi esirtki óndirgen úshin jaza qatańdatylyp, ómir boıy bas bostandyǵynan aıyrylýy múmkin. Buǵan deıin ol uıymdasqan qylmystyq top qurýǵa ǵana qatysty bolatyn. Endigi ýaqytta zań qatań. Bıyl 16 uıymdasqan qylmystyq top anyqtalyp, 20 qylmystyq is qozǵaldy. 60 qatysýshysy, onyń ishinde 16 kóshbasshysy ustaldy olardan 950 keliden asta túrli esirtki zaty tárkilendi, - dedi Baqytjan Ámýrhanov.

Aıta keteıik, Іshki ister mınıstrliginde qoǵamdyq qaýipsizdikti qamtamasyz etýdiń ózekti máselelerine arnalǵan Úkimet saǵaty ótip jatyr.