Bıyl 9 aıda 2,5 mlrd dollardyń aýyl sharýashylyǵy ónimderi eksportqa shyǵaryldy

ASTANA. KAZINFORM – Bıyl 9 aıda 2,5 mlrd dollardyń aýyl sharýashylyǵy ónimderi eksportqa shyǵaryldy. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty. 

— Tamaq ónimderi óndirisi turaqty ósim kórsetip otyr. Osy jyldyń 10 aıynda tamaq óndirisi 3,1 trln teńge bolyp, ótken jyldan 9,1 paıyzǵa artty. Jyl sońyna deıingi jospar — 9,3 paıyz. Tamaq ónimderin óndirýdegi negizgi kapıtalǵa salynǵan ınvestıtsııalar 60 paıyzǵa ósip, 225 mlrd teńge boldy, — dedi ol.

Onyń aıtýynsha, qaıta óńdelgen ónimderdiń eksporty boıynsha da oń dınamıka baıqalady.

— Bıyl 9 aıda eksport kólemi 2,5 mlrd AQSh dollar bolyp, ótken jyldan 32,4 paıyzǵa artty. Ósimniń edáýir bóligin un jáne maı óndirisi salalary qamtamasyz etip otyr. Atalǵan kezeńde un óndirisi 2,8 mln tonnaǵa jetip, ótken jyldan 7%-ǵa ulǵaıdy, ósimdik maıy 21,7%-ǵa ósip, 726 myń tonna boldy. Sút óndirisi 4,7%-ǵa ulǵaıyp, 550 myń tonnaǵa jetti. Jarma 10%-ǵa, shujyq ónimderi 7,8%-ǵa artty, — dedi Aıdarbek Saparov.

Mınıstr salany yntalandyrý sharalary qabyldanyp jatqanyn aıtty.

— Qaıta óńdeý salasy Soltústik Qazaqstan oblysynyń tájirıbesi boıynsha jyldyq 2,5 paıyzben nesıelendiriletin baǵyttar tizbesine engizildi. 2024 jyldan bastap aınalym qarajatyn tolyqtyrýǵa 5 paıyzdyq jeńildetilgen nesıe berilip, 12 kásiporyn 35 mlrd teńgege qarjylandyryldy. Bıyl 44,3 mlrd teńge bólinip, shamamen 100 kásiporyn qamtyldy. Kelesi jyly qarjylandyrý kólemin 1,5 esege ulǵaıtý josparlanyp otyr, — dedi ol. 

Aıta ketelik ındýstrııalyq alańdardy basqarýdyń jańa tetikteri ázirlenedi.