Bıyl 845 myń adam jumyspen qamtyldy
ASTANA. KAZINFORM — 2024 jyly 948 myń qazaqstandyqty jumysqa ornalastyrý josparlanǵan bolatyn, jeltoqsan aıynyń basynda 845 myńnan astam adam jumyspen qamtylǵany málim boldy. Bul týraly Primeminster.kz saıty habarlady.
Jumyspen qamtý salasynda Mınıstrlik jumyssyzdyqty azaıtýǵa jáne jumyspen qamtý protsesiniń ashyqtyǵyn qamtamasyz etýge baǵyttalǵan sharalardy iske asyrýdy jalǵastyrdy. Azamattardy jumysqa ornalastyrýdy josparlaýǵa jáne eńbek naryǵynyń qajettilikterin anyqtaýǵa múmkindik beretin óńirlik Jumyspen qamtý kartalarynyń bekitilýi – mańyzdy qadamdardyń biri.
2024 jyly 948 myń qazaqstandyqty jumysqa ornalastyrý josparlanǵan bolatyn, jeltoqsan aıynyń basynda 845 myńnan astam adam jumyspen qamtylǵany málim boldy, bul jyldyq jospardyń 89%-yn qurady.
-
Eńbek mınıstrligi jumyspen qamtýǵa járdemdesý sharalary keshenin iske asyrýda, onyń arasynda qyzmetkerlerdi kásipke oqytý men qaıta daıarlaý mańyzdy ról atqarady. Bıyl jumys berýshilerdiń qajettilikterin eskere otyryp, 9,6 myń jumyssyz azamat úshin qysqa merzimdi kýrstar uıymdastyryldy. Sonymen qatar skills.enbek.kz platformasynda 50 myńnan astam adam onlaın oqytýdan ótti, bul olardyń biliktiligin arttyrýǵa jáne eńbek naryǵynda básekege qabiletti bolýǵa múmkindik berdi.
-
Budan basqa, jalaqyny sýbsıdııalaý baǵdarlamalary belsendi júzege asyrylýda. Oǵan qoǵamdyq jumystar, áleýmettik jumys oryndary, jastar tájirıbesi jáne «Alǵashqy jumys orny», «Urpaqtar kelisimsharty» jáne «Kúmis jas» jobalary kiredi. Osy baǵdarlamalar aıasynda 180 myńnan astam adam sýbsıdııalanatyn jumys oryndaryna ornalastyryldy.
-
Kásipkerlikti qoldaý jáne jańa jumys oryndaryn qurý úshin «Bastaý Bıznes» jobasy jalǵastyryldy, onyń sheńberinde kásipkerlikke oqytýdan ótken azamattar ózderiniń mıkrobıznesin ashýǵa óteýsiz granttar ala alady. 2024 jyly mundaı kómekke 8,9 myń adam qol jetkizdi.
«Mansap Compasy» platformasy
Jumyspen qamtý salasyndaǵy jańa jetistikterdiń biri azamattar úshin jańa múmkindikter ashqan tsıfrlyq sheshimderdi engizý boldy. Atap aıtqanda, «Mansap Compasy» platformasy iske qosyldy, ol mamandyq tańdaý jáne mansap jolyn josparlaý quralyna aınaldy. Platforma suranysqa ıe mamandyqtar, oqytý talaptary, granttar men taǵylymdamalarǵa qol jetkizý múmkindikteri týraly ózekti aqparatty usynady. Bul mektep túlekteri men stýdentterge bolashaqty baǵdarlaýǵa kómektesedi ári jastardyń jumyssyzdyq deńgeıin tómendetýge yqpal etedi.
Stýdentter praktıkalyq daǵdylardy ıgerý úshin Elektrondy eńbek bırjasynda óndiristik praktıkadan ótý ornyn tabýǵa kómektesetin fýnktsıonal iske qosyldy. Nátıjesinde stýdentter naqty daǵdylarǵa ıe bolady jáne básekege qabilettiligi artady.
Memlekettik ınvestıtsııalardyń tıimdiligin arttyrý úshin sapaly josparlaý mańyzdy aspekt bolyp sanalady. Osy maqsatta Jobalardyń ınnovatsııalyq navıgatory ázirlendi. Búgingi tańda júıede jospar boıynsha 150 myń jumys orny ashylatyn 755 ınvestıtsııalyq jobaǵa monıtorıng júrgizilýde. Keıinnen osy platforma arqyly memlekettik bastamalar sheńberinde iske asyrylatyn barlyq jobalarǵa monıtorıng júrgizý josparlanyp otyr. Budan basqa, Mınıstrlik óńirler men salalar bólinisinde «sapaly jumys oryndaryn» monıtorıngteýdiń aqparattyq júıesin paıdalanyp jatyr.
«Sapaly jumys orny» turaqty jumyspen qamtylǵan, qaýipsiz eńbek jaǵdaılary, kásibı damý jáne mansaptyq ósý múmkindikteri bar, eńbek quqyqtary men áleýmettik qorǵalýy qamtamasyz etilgen jumyspen qamtýdy bildiredi. Ótken jyly Qazaqstanda osyndaı 2,27 mln jumys orny bolǵan. Aldaǵy 3 jylda bul kórsetkishti 824 myńǵa arttyrý josparlanyp otyr.