Bıyl 77 joba júzege asyp, 300 myń qazaqstandyq gazben qamtylmaq
ASTANA. KAZINFORM – Gazdandyrý – aýyldaǵy ómir sapasyn arttyryp, áleýmettik ınfraqurylymdy damytýdyń mańyzdy tetigi. Atalǵan baǵyttaǵy jumystar óńirlerde belsendi júzege asyrylyp jatyr. Bul týraly Energetıka mınıstrligi baspasóz qyzmeti habarlady.
Atap aıtar bolsaq, Almaty oblysyndaǵy Sharyn aýylynda uzyndyǵy 64 km bolatyn gaz qubyrynyń qurylysy aıaqtalyp, 1 200-den astam úıge, mektepke, aýrýhanaǵa, balabaqshaǵa jáne ákimshilik ǵımarattarǵa gaz qosyldy. Tashqarasý jáne Baharq aýyldarynda qurylys jumystary belsendi júrip jatyr. Jaqyn arada taǵy 978 úı men áleýmettik nysandar gazǵa qosylady.
Joba Memleket basshysynyń tapsyrmalary jáne Qazaqstandy 2030 jylǵa deıin gazdandyrýdyń Bas syzbasy aıasynda «QazaqGaz» ulttyq kompanııasymen júzege asyrylyp jatyr. Búginde Almaty oblysynda 1,2 mıllıonnan astam turǵyn nemese óńir halqynyń 77%-y tabıǵı gazǵa qol jetkizgen. Oblysta 373 eldi mekenniń 157-si, sonyń ishinde bes qala tolyq gazdandyryldy. Gaz jelileriniń jalpy uzyndyǵy 4 200 km-den asady, al jyldyq tutyný kólemi – 200 mln tekshe metr.
Jalpy, Qazaqstan boıynsha gazdandyrý deńgeıi 62,4%-dy qurady. Bul degenimiz – 20,2 mln halyqtyń 12,6 mıllıony tabıǵı gazǵa qol jetkizgen. Bul kórsetkish 2023 jylmen salystyrǵanda 2,4%-ǵa joǵary. 2024 jyly 4 000 km-den astam gaz qubyry salynyp, 93 joba iske asyryldy. Bıyl taǵy 77 jobany aıaqtap, 300 myńnan astam adamdy gazben qamtamasyz etý josparlanyp otyr.
Eske sala keteıik, buǵan deıin Batys Qazaqstanda suıytylǵan gaz tapshylyǵy nelikten baıqalyp otyrǵanyn jazǵan edik.