El boıynsha 72 mekteptiń qurylysy aıaqtalady
ASTANA. KAZINFORM — Bıyl Aqtóbe men Semeı qalalaryndaǵy 15 mektepte ınklıýzııany qoldaý kabınetteri ashylady. Bul týraly Úkimet otyrysynda Oqý-aǵartý mınıstri Juldyz Súleımenova aıtty.
— Mektepterdi pándik kabınettermen jabdyqtaý jumystary jalǵasyp jatyr. Josparlanǵan 1 409 kabınettiń búginde 1 007-si, ıaǵnı 70 paıyzy jetkizildi. Sonymen birge adamı kapıtaldy damytýǵa, balalar men jastardy qoldaýǵa, bilim berýde teń múmkindikterdi qalyptastyrýǵa baǵyttalǵan áleýmettik jobalardy júzege asyrý arqyly «Samruk-Kazyna» qorynyń bilim berý salasyn damytýǵa qosqan úlesin atap ótýge bolady. Máselen, qor 2024 jyldan bastap mektepterde ınklıýzııany qoldaý kabınetterin ashyp jatyr. Búginde mundaı kabınetter 31 mektepte ashyldy. 2026 jyly joba Aqtóbe men Semeı qalalaryndaǵy taǵy 15 mektepte júzege asyrylatyn bolady, — dedi Súleımenova.
Sonymen qatar mınıstr kúrdeli jóndeý jumystary jalpy jobalyq qýaty 117 myń oqýshy orny bolatyn 178 mektepte júrgizilip jatqanyn atap ótti. Onyń málimetinshe, 1 qyrkúıekke deıin 106 mekteptegi kúrdeli jóndeý jumystaryn aıaqtaý josparlanǵan.
— Qazirgi ýaqytta 59,3 myń oqýshy ornyna arnalǵan 101 mekteptiń qurylysy júrgizilip jatyr. Jyl sońyna deıin 38,2 myń oqýshy ornyna arnalǵan 72 mekteptiń qurylysy aıaqtalady, — dedi mınıstr.
Buǵan deıin jańa oqý jylynda oqýshylar qandaı kýrstardy mindetti túrde oqıtynyn jazǵan edik.
