Bıyl 7 myńnan astam aqmolalyq turǵyn úı jaǵdaıyn jaqsartty

ASTANA. KAZINFORM — Aqmola oblysynda baspanamen birinshi kezekte áleýmettik osal top ókilderi, úleskerler, apatty jaǵdaıdaǵy úı turǵyndar men baspana kezeginde turǵan jandar qamtylyp jatyr. Bul týraly Aqmola oblysynyń ákimi Marat Ahmetjanov málim etti. 

— Memleket basshysy aıqyndaǵan strategııalyq baǵdarǵa sáıkes, muqtaj azamattardy jaıly jáne sapaly turǵyn úımen qamtamasyz etý boıynsha belsendi jumys júrgizilip jatyr. Bıyl jalpy 7 myńnan astam jerlesimiz turǵyn úı jaǵdaıyn jaqsartty. Onyń 2 myńy muqtaj jandar, ıaǵnı áleýmettik turǵydan osal top ókilderi, sonymen qatar úı kezeginde turǵandar, aldanǵan úleskerler jáne apatty jaǵdaıdaǵy úılerdiń turǵyndary bar. Óńirde bıznespen yntymaqtastyqqa negizdelgen jańa ári tıimdi tásilder engizildi. Jeke qurylys kompanııalarynan «daıyn páterlerdi satyp alý» mehanızmi áleýmettik turǵyn úıdi tez salýǵa múmkindik beretinin kórsetti. Bıyl 750 páter satyp alyndy. Bul mehanızm jeke ınvestıtsııalardy renovatsııalaý baǵdarlamasyna tartýǵa jáne problemalyq úlestik úılerdi aıaqtaýǵa jol ashty, — dedi Marat Ahmetjanov ortalyq kommýnıkatsııalar qyzmeti alańynda óńirdiń áleýmettik-ekonomıkalyq damý áleýeti týraly esep bere turyp.

Ákim keltirgen málimetke sáıkes, bıyl renovatsııalaý baǵdarlamasy aıasynda 11 kópqabatty úı salyndy, olar eskirgen jáne tozyǵy jetken úılerdiń ornyna turǵyzyldy.

— Qosshy qalasynda 543 páterli turǵyn úı kesheniniń qurylysy aıaqtaldy, onyń 110 páteri aldanǵan úleskerlerge tegin berildi. Ol kóp jylǵy qordalanǵan máseleni sheshýde mańyzdy qadam boldy. Qalǵan páterler Prezıdenttiń daıyn turǵyn úıdi satyp alý jónindegi baǵdarlamasy aıasynda satyp alyndy. Qalǵan úleskerler boıynsha másele kezeń-kezeńimen sheshiledi. Turǵyn úı saıasatyn damytýdaǵy oń dınamıka kelesi jyly da saqtalady, — deıdi óńir basshysy.

Bıyl Aqmola oblysynyń dıqandary rekordtyq kólemde astyq jınady. 

Aıta keteıik, Aqmola oblysynda astyqty tereń óńdeıtin alǵashqy zaýyt qurylysy bastaldy.