Bıyl 7 aıda 323 adam astan ýlanǵan
ASTANA. KAZINFORM – Bıyl kóshe taǵamdarynan ýlaný jaǵdaıy byltyrǵymen salystyrǵanda 2 ese kóp. Bul týraly DSM Tamaqtaný, bilim berý jáne tárbıeleý obektilerin sanıtarııalyq-gıgıenalyq baqylaý jáne qadaǵalaý basqarmasynyń bas sarapshysy Kazinform tilshisine bergen suhbatynda málimdedi.
– 2025 jyldyń ótken aılarynda saýda obektilerine qatysty toptyq taǵamnan ýlanýdyń 4 jaǵdaıy tirkeldi. Al byltyr kóshe taǵamdaryna qatysty 2 oqıǵa bolǵan, – deıdi Aıaýlym Tasqynǵalı.
Bıyl el turǵyndary 2 ret quıylmaly balmuzdaq jeımin dep aýrýhanadan bir-aq shyqqan. Derekterdiń biri Shymkent qalasynda, endi biri Ulytaý oblysynyń Sátpaev qalasynda tirkelipti.
– Shymkent qalasynda 17 adam zardap shekti. Onyń 11-i – 14 jasqa deıingi balalar. Sátpaev qalasynda balmuzdaqtan ýlanǵan 7 adamnyń 6-ýy bala.
Eki jaǵdaıda da satý ornynyń jáne ony tikeleı daıyndaǵan tsehtardyń jumys isteýge ruqsat qaǵazdary men balmuzdaqtyń qujattary joq. Jumyskerler medıtsınalyq tekserýden ótpegen, – dedi mınıstrlik mamany.
Dúkennen kondıterlik ónim jeımin dep taǵy 7 jambyldyq azamat zardap shekken. Onyń 4-eýi 14 jasqa tolmaǵandar. Mundaı jaǵdaı astanalyqtardy da aınalyp ótpepti.
– 4-shi oqıǵa Astana qalasynda boldy. Dúkennen satyp alynǵan taýyq etinen jasalǵan donerdi jeımin dep, 11 adam zardap shekti. Onyń 4-eýi bala. Doner úı jaǵdaıynda daıyndalǵan. Dúken bolsa, ónimdi eshqandaı qujatsyz qabyldap, saqtaý sharalaryn buzǵan, – deıdi basqarmanyń bas sarapshysy.
Al jyl basynan beri jalpy jappaı taǵamnan ýlanǵandar sany budan da kóp.
– Byltyr 7 aıda barlyǵy 11 jaǵdaı tirkelgen bolsa, 2025 jyldyń alǵashqy 7 aıynda 20 jaǵdaıǵa deıin ósip otyr. ıAǵnı jappaı taǵamnan ýlaný 1,8 ese kóbeıgen. Saldarynan 156 eresek, 167 bala zardap shekti, – deıdi spıker.
Bıyl jappaı astan ýlaný jaǵdaılary eń kóp tirkelgen óńir – Astana qalasy. Munda tutynýshylar 4 ret tamaqtaný oryndaryndaǵy taǵamnan ýlanyp qalǵan. Jambyl, Qaraǵandy, Qyzylorda, Mańǵystaý, Pavlodar jáne Túrkistan oblystarynda eki oqıǵadan tirkelse, Aqmola, Atyraý, Qostanaı oblystary men Shymkent qalasynda bir-birden bolypty.
Aıta keteıik, jaqynda ǵana Aqtóbede turǵyndar sýshıden ýlanyp, 8 adam jumystan shettetildi.