Bıyl 60-tan astam eldi meken turǵyndary kógildir otynǵa qol jetkizedi

ASTANA. KAZINFORM — Bıyl 6 aıda 7,6 mln tonna munaı ónimderi óndirildi. Bul týraly Úkimet úıinde ótip jatqan baspasóz máslıhatynda Premer-mınıstrdiń birinshi orynbasary Roman Sklıar aıtty. 

— Munaı-gaz salasynda 1-shi jartyjyldyqtyń qorytyndysy boıynsha 7,6 mln tonna munaı ónimderi óndirildi. Jyldyq jospar — 14,8 mln tonna. Bıyl 62 mlrd tekshe metr gaz óndirý josparlanǵan. 94 eldi meken gazben qamtamasyz etiledi, 300 myńnan astam adam kógildir otynǵa qol jetkizedi. Qyrkúıek aıynda uzyndyǵy 302 shaqyrym bolatyn «Taldyqorǵan — Úsharal» magıstraldyq gaz qubyry iske qosylady. Bul 60-tan astam eldi mekendi gazben qamtamasyz etýge múmkindik beredi. Sáýir aıynda «Beıneý-Bozoı-Shymkent» magıstraldyq gaz qubyry ekinshi jelisiniń qurylysy bastaldy. Ony kelesi jyldyń sońyna deıin paıdalanýǵa berý josparlanyp otyr, — dedi ol.

Onyń málimetinshe, munaı-gaz hımııasy salasynda 6 aıdyń qorytyndysy boıynsha 380 myń tonnadan astam ónim óndirildi. Bul ótken jyldyń deńgeıinen 12,7 paıyzǵa artyq. Energetıka salasynda bıyl birinshi jartyjyldyqta 62,2 mlrd kVt/saǵ elektr energııasy óndirildi. Bul ótken jyldyń deńgeıinen 3,3 paıyzǵa joǵary. 2028 jylǵa qaraı jalpy qýattylyǵy shamamen 6 700 MVt bolatyn jańa generatsııa iske qosylady. Onyń ishinde bıyl dástúrli jáne balamaly qýat kózderi boıynsha 620 MVt jańa generatsııa paıdalanýǵa beriledi.

— Turǵyn úı qurylysy salasynda rekordty 19,2 mln sharshy metr turǵyn úıdi paıdalanýǵa berý josparlanyp otyr. 6 aıdyń qorytyndysy boıynsha 7,9 mln sharshy metr paıdalanýǵa berildi, — dedi Roman Sklıar.

Buǵan deıin Energetıka mınıstrligi gaz jobalaryn jedeldetýdi kózdep otyrǵanyn jazǵan edik.