Bıyl 6 monoqala men 17 shaǵyn qalada 42 joba júzege asyrylady

ASTANA. KAZINFORM – Bıyl aýyldarda mamandardy baspanamen qamtamasyz etýge 25 mlrd teńge qarastyrylǵan. Bul týraly elordada Senat janyndaǵy máslıhattarmen ózara is-qımyl jónindegi keńestiń otyrysynda Premer-Mınıstrdiń orynbasary Ermek Kósherbaev málim etti.

- Aýyldy eldi mekenderde 7,5 mln adam turyp jatyr, bul halyqtyń 37 paıyzy shamasynda. Aýyldarda densaýlyq saqtaý salasyn jáne jaıly mektepterdi jańǵyrtýdyń ulttyq jobalary aıasynda zamanaýı medıtsınalyq nysandar men mektepter salynyp, zamanaýı qural-jabdyqtar ornatylyp otyr. Sondaı-aq, bıýdjet esebinen jańa sport nysandary, mádenıet úıleri, saýyqtyrý ortalyqtary salynyp, jol jóndeý jumystary atqarylyp jatyr, - dedi E. Kósherbaev.

Onyń aıtýynsha, «Aýyl — el besigi» baǵdarlamasy aıasynda 1 myń jobany júzege asyrýǵa 500-den astam aýylǵa 176 mlrd teńge qarastyrylǵan.

- «Dıplommen aýylǵa» jobasy boıynsha 2024 jyldyń 1 qańtarynan bastap bıýdjettik nesıeniń mólsheri 1500-den 2500 AEK-ke deıin ósti, ıaǵnı 5,4 mln teńgeden 9,2 mln teńgege deıin. Bıyl 2800-ge jýyq mamandy baspanamen qamtamasyz etý baǵytynda jobaǵa 25 mlrd teńge qarastyrylǵan. Sonymen qatar, bıyl 6 monoqala jáne 17 shaǵyn qalada 42 jobany júzege asyrýǵa 12 mlrd teńge qarastyrylǵan. Úkimet óńirlik ınfraqurylymdyq jobalardy qarjylandyrýdy jalǵastyrady, - dep naqtylada vıtse-premer.

Eske salsaq, byltyr Energetıka mınıstri monoqalalarǵa gaz tartý josparyna túsinik bergen edi.