Bıyl 6 myń aýyl sharýashylyǵy tehnıkasy lızıngke alynady
ASTANA. KAZINFORM — Bıyl elimizde keminde 6 myń aýyl sharýashylyǵy tehnıkasyn lızıngke alý josparlanǵan. Bul týraly Aýyl sharýashylyǵy mınıstrliginen málim etti.
— Bıylǵy kóktemgi dala jáne egin jınaý jumystaryn júrgizý úshin jeńildetilgen qarjylandyrý kólemi 700 mlrd teńgeni quraıdy. Al aýyl sharýashylyǵy tehnıkasyn jeńildetilgen lızıngpen qarjylandyrý 250 mlrd teńgege jetkiziledi. Bıýdjet qarajatynyń shekteýli bolýyn eskere otyryp, bul baǵdarlamalar oblıgatsııalar túrindegi naryqtyq qarajatty tartý arqyly júzege asyrylmaq. Kýpondyq syıaqynyń jalpy somasy 116,8 mlrd teńgeni quraıdy. Osylaısha, naryqtyq jáne bıýdjettik qarajatty tartý esebinen fermerler aýyl sharýashylyǵy tehnıkasyn lızıngke jáne kóktemgi dala jáne egin jınaý jumystaryna 5 paıyz mólsherindegi qoljetimdi syıaqy mólsherlemesimen nesıe ala alady, — dedi vedomstvodan agenttik saýalyna oraı.
Kóktemgi dala jáne egin jınaý jumystaryna jeńildetilgen nesıeleý baǵdarlamasy aıasyndaǵy qarajat mynadaı 6 túrli arna arqyly bólinedi:
— «Agrarlyq nesıe korporatsııasy» AQ arqyly tikeleı nesıeleý;
— ekinshi deńgeıli bankter;
— mıkroqarjy uıymdary;
— óńirlik ınvestıtsııalyq ortalyqtar;
— nesıe seriktestikteri;
— áleýmettik-kásipkerlik korporatsııalar.
— Memleket basshysy 2024 jylǵy 15 qarashada ótken alǵashqy Aýyl sharýashylyǵy qyzmetkerleri forýmynda bergen tapsyrmaǵa sáıkes, 2024 jyly birinshi ret 2025 jylǵy kóktemgi dala jáne egin jınaý jumystaryn erte qarjylandyrý baǵdarlamasy iske qosyldy. Eldiń barlyq óńirinde 2024 jylǵy 29 qarashadan bastap «Agrarlyq nesıe korporatsııasy» AQ jelisi boıynsha 2025 jylǵy kóktemgi egis jumystaryn erte qarjylandyrýǵa ótinimder qabyldandy. Qazirgi tańda kóktemgi dala jáne egin jınaý jumystaryn jeńildetilgen nesıeleý aıasynda 496,2 mlrd teńgege jalpy 7 494 ótinim tústi. Onyń ishinde 7 387 aýyl sharýashylyǵy taýar óndirýshisi 482,3 mlrd teńge somasyna qarjylandyryldy. Bul 7,7 mln gektar egistik jerdi qamtýǵa múmkindik berdi, — dedi mınıstrlikten.
Vedomstvo málimetinshe, «Damý» kásipkerlikti damytý qory» AQ arqyly kepildik berý baǵdarlamasy jalǵasyp jatyr. Bul baǵdarlama kepildik bazasy jetkiliksiz fermerlerge kóktemgi dala jáne egin jınaý jumystaryna beriletin nesıeniń 85 paıyzyna deıin kepildik berýdi kózdeıdi. Atalǵan qarajat shamamen 250 mlrd teńgeniń nesıesin qamtýǵa múmkindik beredi. Búgingi tańda 1 271 kepildik berildi. Dalpy kepildik somasy 219,7 mlrd teńgeni, al berilgen nesıelerdiń jalpy kólemi 186,8 mlrd teńgeni quraıdy.
— «QazAgroQarjy» AQ boıynsha «Jeńildetilgen lızıng» baǵdarlamasy aıasynda ótinim qabyldaý 2025 jylǵy 24 aqpanda bastaldy. Qazirgi ýaqytta 3 684 ótinim qabyldanyp, 147,2 mlrd teńge kóleminde qarastyryldy. Onyń ishinde 3 034 ótinim boıynsha 5 868 birlik aýyl sharýashylyǵy tehnıkasyn jetkizýge 112,5 mlrd teńge somasyna qarjylyq lızıng sharttary jasaldy. 2025 jyly keminde 6 myń birlik aýyl sharýashylyǵy tehnıkasyn lızıngke alý josparlanýda, — dedi vedomstvodan.
Aıta keteıik, jyl basynda ótken Úkimettiń keńeıtilgen otyrysynda Prezıdent Qasym-Jomart Toqaev tıimdiligi tómen sýbsıdııalaý tásilinen jeńildikpen nesıe berý tásiline kóshý qajettigin aıtqan edi.