Bıyl 6 bala óz jaqyndarynyń qolynan ajal qushqan

Jyl basynan beri el boıynsha 25 bala mert bolǵan, onyń ishinde 6 bala óz jaqyndarynyń qolynan ólip otyr, dep habarlaıdy Kazinform.

Atalǵan problemany QR Bala quqyqtary jónindegi ýákil Dınara Zákıeva kóterdi. 

«Búgin 7 jasar qyz qaıtys boldy. Aldyn ala málimet boıynsha, kúdikti — qyzdyń anasy. Otbasynyń qalǵan bala-shaǵasy balalardy qoldaý ortalyǵyna ornalastyrylady. Tergeý barysynda osyndaı isterdiń 70 paıyzyna aınalasyndaǵy adamdar kýá bolǵany, bárin kórip júrgeni belgili bolady. Olar otbasyndaǵy aýyr jaǵdaıdy bilse de, aralasqysy kelmeı nemese qorqyp aıtpaıdy eken. Eger balalarǵa qaýip tónip turǵanyna kýá bolsańyzdar, „111“ nemese „102“ nómirine habarlasyńyzdar», — dep jazdy Dınara Zákıeva Facebook paraqshasynda. 

Onyń aıtýynsha, Prezıdent tapsyrmasymen balalardy qorǵaý zańnamasyna engizilgen ózgeristerdiń mańyzy zor.

Ol jerde bala quqyǵyn qorǵaýda qylmystyq jaýapkershilik qarastyrylǵan. Zańnamaǵa bas-aıaǵy 109 ózgeris engizilgen. 

«Sonymen qatar úkimettik emes uıymdarmen birlesip áleýmettik zerthana ashtyq. Kelesi másele — kadr kerek. Zań qabyldanǵan soń onyń oryndalýyn qadaǵalaýymyz qajet. Qazir 6,8 mln balaǵa 303 áleýmettik qyzmetkerden keledi. Demek 1 qyzmetkerge — 22 myń bala. Álemdik praktıkada 1 qyzmetshige 5 myńnan artyq bala berilmeıdi. Bul máseleni qazir Oqý-aǵartý mınıstrligimen birge qarastyryp jatyrmyz. Erteń — halyqaralyq bala kúni. Osyǵan oraı 111 jedel jelisi týraly aqparatty barynsha taratýdy suraımyn», — deıdi ol.