Bıyl 5,6 mln gektar alqapqa orman órtterin erte anyqtaý júıesi ornatylady

ASTANA. KAZINFORM — «Semeı ormany» rezervatyna kiretin 600 myń gektar alqapqa orman órtterin erte anyqtaý júıesi ornatylady. Bul týraly Úkimet otyrysynda Ekologııa jáne tabıǵı resýrstar mınıstri Erlan Nysanbaev málim etti.

— Orman órtterin joıýdaǵy mańyzdy másele olardy der kezinde anyqtaý bolyp tabylady. Osy maqsatta orman órtterin erte anyqtaý júıesin engizý jalǵasýda. Elimizde osyndaı júıelerimen memlekettik orman qorynyń 1,3 mln ga qamtylǵan, — dedi ol.

Mınıstrdiń sózinshe, bıyl bıýdjet esebinen «Semeı ormany» rezervatynda 600 myń gektar qamtıtyn júıe ornatylady.

— «Semeı ormany» rezervatynan basqa, 23 orman sharýashylyǵynda júıe ýtıl tólem esebinen engiziledi. Osylaısha jyl sońyna deıin erte anyqtaý júıesi 5,6 mln gektar memlekettik orman qoryn qamtıdy, — dedi Erlan Nysanbaev.

Aıta keteıik, Shyǵys Qazaqstan oblysy Zaısan aýdanynda órt sóndirýshiler qamys pen shópti sharpyǵan tilsiz jaýmen áli kúresip jatyr.