Bıyl 53 eldi mekenge ortalyqtandyrylǵan aýyzsý júıesi alǵash ret qosylady
ASTANA. KAZINFORM – Bıyl 53 eldi mekenge ortalyqtandyrylǵan aýyzsý júıesi alǵash ret qosylady. Bul týraly Úkimet otyrysynda Sý resýrstary jáne ırrıgatsııa mınıstri Nurjan Nurjigitov aıtty.
- Búgingi tańda respýblıkalyq menshikte jalpy sany 32 toptyq sý qubyry bar. Olar 1 mıllıon 393 myń adamdy qamtıtyn 581 aýyldyq eldi mekendi aýyzsýmen qamtamasyz etip otyr. Ákimshilik reformanyń jáne «Qazsýshar» kásipornyn transformatsııalaý aıasynda 2024 jyldan bastap toptyq sý qubyrlaryn kezeń-kezeńimen jergilikti atqarýshy organdardyń menshigine ótkizý jumystary júrgizilýde. Bul qadam halyqtyń turmys-tirshiligin qamtamasyz etý maqsatynda qabyldanyp, sýdyń kózinen bastap sońǵy tutynýshyǵa deıingi barlyq kezeńge tolyq baqylaý ornatýǵa múmkindik beredi, - dedi mınıstr.
Onyń dereginshe, sý ınfraqurylymyn jaqsartý maqsatynda mınıstirlik bıyl Aqmola, Atyraý, Almaty, Ulytaý, Qaraǵandy, Qyzylorda, Mańǵystaý, Túrkistan, Batys Qazaqstan jáne Soltústik Qazaqstan oblystarynda toptyq sý qubyry nysandaryn salý jáne qaıta jańartý boıynsha 31 jobany iske asyryp jatyr.
- Atalǵan 31 jobany tolyq iske asyrý nátıjesinde 2,6 myń shaqyrymnan astam sý qubyry salynady jáne bul 1,3 mln halyq turatyn 468 eldi mekenniń sýmen jabdyqtaý sapasyn jaqsartady. Sonymen qatar 53 eldi mekenge ortalyqtandyrylǵan aýyzsý júıesi alǵash ret qosylatyn bolady. Bul jobalardy iske asyrý úshin bıyl 101 mlrd teńge bólindi. Onyń ishinde 38,2 mlrd teńge - Ulttyq qordan, 53,9 mlrd teńge - arnaıy memlekettik qordan. 3,4 mlrd teńge respýblıkalyq bıýdjetten baǵyttalǵan, - dedi ol.
Nurjan Nurjigitovtyń atap ótýinshe, 2025 jyldyń alǵashqy 5 aıynyń qorytyndysy boıynsha shamamen 250 shaqyrym sý qubyry jelileri salyndy. Jyl sońyna deıin 6 oblysta 10 joba paıdalanýǵa beriledi dep kútiledi.
- Atalǵan jobalardy iske asyrý nátıjesinde shamamen 500 myń turǵyny bar 150 aýyldyq eldi mekenniń sýmen qamtý jaǵdaıy jaqsarady. Onyń ishinde 1542 turǵyny bar 4 aýylǵa alǵash ret ortalyqtandyrylǵan aýyzsý júıesi qosylady. Sonymen qatar Aqmola, Túrkistan jáne Soltústik Qazaqstan oblystarynda toptyq sý qubyrlaryn qaıta jańartý boıynsha 6 jobaǵa jobalyq-smetalyq qujattama ázirlenip jatyr. Bul jobalar 102 shaqyrym sý qubyry jelilerin qaıta jańartýdy kózdeıdi. 335 myń adam turatyn 202 eldi mekenniń sýmen jabdyqtaý sapasyn jaqsartýǵa múmkindik beredi, - dedi mınıstr.
Buǵan deıin Oljas Bektenov iske asyrylý merzimi sozylyp ketken taza aýyz sý jobalaryn ataǵan edi.