Bıyl 5 jasóspirim destrýktıvti áreketi úshin sottaldy
ASTANA. KAZINFORM – Jyl basynan beri destrýktıvti áreketi úshin sottalǵan adamdardyń sany byltyrǵy kórsetkishten asyp ketken. Bul týraly Ulttyq qaýipsizdik komıteti túsirgen «Arbaý» atty 15 mınýttyq derekti fılmde aıtylǵan.
Fılmde ekstremıstik vıdeo taratqany úshin Qylmystyq kodekstiń 256-babymen sottalǵan 16 jastaǵy keıipker teris aǵymnyń arbaýyna qalaı túskenin baıandaıdy.
«Telegram-da «Kavkaz ýálaıaty» deıtin topqa kirdim. Sonda Ahmad degen balamen tanystym. Ol aıtty, «jıhadqa shyǵýshylarǵa arnap vıdeo sal» dedi. Telegram-nan chatyn izdedim. TikTok-qa kirip, chatty taptym. Chatqa kirip, tanystym. Tanysqannan keıin kanalǵa «Daýl-atýl-ıslam» degen taqyryppen vıdeo júktedim. Oıym Sırııaǵa baryp, jıhadqa shyǵý boldy. Sol jaqta jıhad jasaǵym keldi», - deıdi keıipker.
Fılmde «sottalǵan balanyń anasy» dep sıpattalǵan áıel uly Telegram-nan bireýlerdiń adam basyn kesip jatqan sáti bar vıdeo kórsetkenin, oǵan asa mán bermegenin aıtady.
UQK jedel qyzmetkeri keıipker aıtyp otyrǵan vıdeoda DAISh halyqaralyq terrorıstik uıymynyń sodyrlarynyń áreketi beınelengenin aıtady.
«Arnaıy qyzmet adamdaryn ustap, «kápir» retinde aıaýsyz óltirgen beınelerdi júktep otyrdy. Sonymen qatar úıiniń mańynda arab ultyna tán kıimmen vıdeo túsirip, arab mýzykasynyń súıemeldeýimen jıhadqa shaqyratyn, óziniń de jıhadqa baratyn oıy bar ekeni týraly jazbalar qaldyrdy», - deıdi jedel qyzmetker.
Keıipkerdiń anasy naýryzdan bastap balasy TikTok arqyly tanysqan adamdarmen tikeleı kezdese bastaǵanyn aıtady.
Keıipkerdiń ózi TikTok-tan top ashyp, Telegram-ǵa júktegen vıdeolarynyń siltemesin qaldyryp otyrǵanyn, toptaǵy oqyrmandary ol usynǵan kontentti sol siltemeler arqyly kórgenin aıtady. Óıtkeni qatygezdik sıpattaǵy vıdeony tikeleı TikTok-qa salý múmkin emes edi.
Saıasattanýshy Eldos Moldahmetov jastardyń osyndaı mazmundaǵy aqparatqa tez eltip, arbalýyn til bilmeýden kóredi.
«Dinı ǵulamalardyń arabsha aıtqan ýaǵyzdary ınternette kóp. Til bilmegen adamǵa olardyń shyn máninde ne aıtyp jatqanyn uǵý múmkin emes. Al destrýktıvtik maqsattaǵy adamdar sol vıdeolardyń kez kelgen jerinen qıyp alyp, oryssha «aýdarma» jasap taratady. Ol «aýdarmada» jıhadqa shaqyrǵan urandar aıtylady. Osyǵan kóp jastar arbalyp qalady», - deıdi ol.
2023 jyldyń basynan beri derekti fılmniń keıipkeri sııaqty destrýktıvti áreketi úshin sottalǵan jasóspirimniń sany 7-ge jetken.
«2023 jyly 42 adam destrýktıvtik áreketteri úshin qylmystyq jazaǵa tartyldy. Onyń ekeýi kámeletke tolmaǵan balalar. Al bıyl 68 adam sottaldy. Onyń beseýi jasóspirim. Bul sanaqty artynda adamdardyń taǵdyry men ómiri turǵany alańdatady», - deıdi Ulttyq qaýipsizdik komıteti baspasóz qyzmeti bastyǵynyń orynbasary Maıgúl Aınabekova.
