Bıyl 450 myńǵa jýyq balaǵa mektepke daıyndalýǵa kómek kórsetiledi - mınıstrlik
ASTANA. KAZINFORM – 2026 jylǵy 1 tamyzdan 30 qyrkúıekke deıin Jalpyǵa mindetti bilim berý qory aıasynda áleýmettik osal sanattaǵy balalarǵa mektep formasyn, aıaq kıim men mektep quraldaryn satyp alýǵa kómek kórsetiledi.
QR Oqý aǵartý-mınıstrligi baspasóz qyzmetiniń habarlaýynsha, 2026-2027 oqý jyly qarsańynda 450 myńǵa jýyq balaǵa qoldaý kórsetiledi. Osy maqsatqa jergilikti bıýdjetterde 23 mlrd teńgege jýyq qarajat qarastyrylǵan. Kómektiń eń tómengi mólsheri bir balaǵa 50 851 teńgeni quraıdy. Bul ótken jylmen salystyrǵanda 10 paıyzǵa artyq.
Jergilikti bıýdjettiń múmkindikterine qaraı jekelegen óńirlerde tólem mólsheri joǵary bolýy múmkin. Kómek jetim balalar men ata-anasynyń qamqorlyǵynsyz qalǵan balalarǵa, az qamtylǵan otbasylardan shyqqan oqýshylarǵa, ataýly áleýmettik kómek alatyn otbasylardyń balalaryna, sondaı-aq ómirlik qıyn jaǵdaıǵa tap bolǵan balalarǵa beriledi.
Tólemdi alý úshin ata-analar nemese zańdy ókilder tıisti qujattardy bilim berý uıymyna tapsyrýy qajet.
Osyǵan deıin QR Oqý-aǵartý mınıstrligi 2026-2027 oqý jylynyń bastalý, aıaqtalý merzimi men demalys kezeńderin bekitti.
