Bıyl 43 myńnan astam qazaqstandyqtan qaterli isik anyqtaldy

ASTANA. KAZINFORM — Qazaqstanda 400 myńnan astam onkologııamen aýyratyn naýqas esepte tur. Bul týraly QR Densaýlyq saqtaý mınıstri habarlady.

– Kelesi aptada Astanada protondy terapııa ortalyǵy ashylady. Bul ortalyq jylyna 900-ge deıin isigi qıyn jerde ornalasqan naýqastardy qabyldaıdy. Bul shynymen de serpilis. Biz álemde protondy terapııa ortalyǵyn ornatyp iske qosqan 25-shi elmiz. Bul TMD elderindegi úshinshi apparat. Al Ortalyq Azııada alǵashqy, - deıdi Aqmaral Álnazarova Halyqaralyq ǵylymı-praktıkalyq konferentsııasynda.

Mınıstr radıofarmatsevtıkalyq preparattardy óndirý máselesine de toqtaldy.

– Búgin jańa preparattar jelisi iske qosylyp jatyr. Qazir dıagnostıkalaý men emdeý úshin qoldanylatyn birneshe preparat bar. Biraq biz damýdy toqtatpaımyz. Aldaǵy kúnderi dıagnostıkalaý men emdeýge arnalǵan alǵashqy preparat iske qosylady. Sonymen qatar, radıoaktıvti ıod qoldanylatyn terapııa úshin palatalar sanyn kóbeıttik. Bıyl taǵy 8 palatany ashyp, emdeý jumystaryn bastadyq, - deıdi QR Densaýlyq saqtaý mınıstri.

Protondy terapııa ortalyǵy ótken jyly ashylǵan Ulttyq onkologııalyq ortalyqtyń aýmaǵynda ornalasady. Buryn respýblıkamyzdyń bıýdjeti esebinen protondy terapııany shetelden alý úshin jyl saıyn 2 mlrd teńgeden astam qarajat bólingen. Endi bul em túrin shetelge barmaı-aq, óz elimizde jasaýǵa bolady.

– Qazirgi ýaqytta Ortalyq Azııa elderimen birge, ásirese bas mıy, moıyn, bastyń basqa kúrdeli bólikterinde isikteri bar balalardyń zamanaýı emdi esh qıyndyqsyz alý joldaryn talqylap jatyrmyz. Sońǵy eki jylda bizdiń mamandar protondy terapııa men onkologııa salasyndaǵy jetekshi elderde bilim aldy. Oqytý respýblıkamyzdyń bıýdjeti esebinen júrgizildi. Bul onkologııalyq naýqastarǵa medıtsınalyq qyzmetti aıtarlyqtaı qoljetimdi etedi. Sondaı-aq, Ortalyq Azııa elderiniń naýqastary da medıtsınalyq qyzmetti ońaı ala alady, - dep atap ótti Aqmaral Álnazarova.

Qazaqstandyqtar úshin protondy terapııa memleket esebinen óteledi. Eldegi onkologııalyq kómek memlekettik kepildendirilgen medıtsınalyq kómek sheńberinde tegin kórsetiledi.

– Qazirgi ýaqytta 400 myńnan astam azamat ártúrli onkologııalyq aýrýlar boıynsha esepte tur. Bıyl 43 myńnan astam jańa rak jaǵdaıy tirkeldi. Sonymen qatar, biz erte dıagnostıkalaý kórsetkishin shamamen 30%-ǵa arttyrdyq. Búgingi kúnde bizdiń basty basymdyq – erte dıagnostıka. Sondyqtan onkologııalyq aýrýlardyń ósýi týraly aıtqanda, mańyzdysy – bizdiń kórsetkish Eýropa elderimen salystyrǵanda áli de tómen. Bul aýrýlardyń ósýinde qorqatyn eshteńe joq, bastysy – aýrýlardy ýaqytyly anyqtap, múmkindiginshe erterek emdeýdi bastaý, - dedi Densaýlyq saqtaý mınıstri.

Aıta keteıik, buǵan deıin COVID-19 vaktsınasy qaterli isikpen kúresýge kómektesetini týraly jazǵan edik.