Bıyl 4,3 myń shaqyrym avtojol kúrdeli jóndeýden ótedi
ASTANA. KAZINFORM — Qazaqstan Respýblıkasy Kólik mınıstrliginde jol salasynyń kóktemgi qurylys maýsymyna daıyndyǵyna arnalǵan keńes ótti. Jıynda jol qurylysy materıaldarynyń qory, jol boıyndaǵy servısti damytý jáne sý tasqyny kezeńine daıyndyq máseleleri qaraldy. Bul týraly vedomstvonyń baspasóz qyzmeti málim etti.
Mınıstrlik basshylyǵy bıyl jol salasynda aýqymdy jumystar josparlanǵanyn atap ótip, daıyndyq sharalaryn jedeldetýdi tapsyrdy. Osyǵan baılanysty «osynda jáne qazir» qaǵıdaty boıynsha barlyq uıymdastyrý jumystaryn ýaqytyly aıaqtaý qajettigi aıtyldy.
Keńes barysynda «QazAvtoJol» UK» AQ óńirlik fılıaldarynyń jol qurylysy materıaldaryn daıyndaý boıynsha atqarǵan jumystary tyńdaldy. Búgingi kúni negizgi materıaldardyń qory qalyptastyrylǵan. Atap aıtqanda, 3,1 mln m³ qıyrshyq tas, 78,2 myń tonna bıtým, 15,3 myń tonna temir-beton buıymdary jáne 529 tonna mıneraldy untaq daıyndaldy. Daıyndyq jumystary josparly túrde jalǵasýda. Qazirgi ýaqytta konkýrstyq rásimder júrgizilip jatqan jobalar boıynsha jumystar merdigerlermen shart jasalǵannan keıin bastalady.
Jalpy, 2026 jyly rekonstrýktsııa, kúrdeli jáne ortasha jóndeý jumystarymen 4,3 myń shaqyrym avtojol qamtylady.
— Keńeste jol boıyndaǵy servısti damytý máselesine de erekshe nazar aýdaryldy. Ásirese, azamattardyń qolaıly jaǵdaıyn qamtamasyz etýde mańyzdy ról atqaratyn sanıtarlyq-gıgıenalyq toraptardyń (SGT) jaı-kúıi qaraldy, — delingen habarlamada.
Buǵan deıin keıbir nysandardyń jabyq bolýy nemese sanıtarlyq jaǵdaıynyń talapqa saı kelmeýi týraly turǵyndar tarapynan shaǵymdar túsken. Osyǵan baılanysty Sapa ortalyǵy respýblıkalyq mańyzy bar avtojoldardaǵy jol boıyndaǵy servıs nysandaryna tekserý júrgizdi.
— Tekserý barysynda 684 sanıtarlyq-gıgıenalyq torap pen sýyq dárethana qaraldy. Nátıjesinde 13 SGT-nyń jumys istemeıtini, al 69 sýyq dárethananyń sanıtarlyq jaǵdaıy qanaǵattanarlyqsyz ekeni anyqtaldy, — dep habarlady vedomstvodan.
Mınıstrlik basshylyǵy barlyq jol boıyndaǵy servıs nysandaryn qysqa merzimde tártipke keltirýdi, olardyń úzdiksiz jumysyn qamtamasyz etýdi jáne ınfraqurylymdy kútip ustaý boıynsha jaýapkershilikti kúsheıtýdi tapsyrdy. Sonymen qatar qoǵamdyq baqylaýdy kúsheıtý qajettigi atap ótildi.
Sondaı-aq «QazAvtoJol» UK» AQ málimetine sáıkes, jol boıyndaǵy servıs nysandaryn tıisti deńgeıde qamtamasyz etpegeni úshin Aqmola oblysyndaǵy «QAJ-Servıs» JShS fılıalynyń basshysy qyzmetinen bosatylǵany, sonymen qatar «QazAvtoJol» UK» AQ birqatar basshylary baqylaýdyń jetkiliksizdigi jáne der kezinde shara qoldanbaǵany úshin tártiptik jazaǵa tartylǵany habarlandy. Sanıtarlyq-gıgıenalyq toraptardyń jaǵdaıyna baqylaý kúsheıtilip, anyqtalǵan buzýshylyqtardy jedel joıý sharalary qabyldanady.
Keńeste qaralǵan taǵy bir mańyzdy másele — sý tasqyny kezeńine daıyndyq. Qazirgi ýaqytta respýblıkalyq avtojoldarda 15 myńnan astam sý ótkizgish qubyr tazartylyp, ashyldy.
Jol qyzmetteri joǵary daıyndyq rejımine kóshirildi. Sý tasqyny kezeńinde jedel áreket etý úshin 2,1 myńnan astam mamandandyrylǵan tehnıka ázirlendi. Sonymen qatar yqtımal táýekelderge jedel áreket etý sharalary pysyqtalyp, tótenshe jaǵdaılar kezinde paıdalanylatyn balamaly marshrýttar aıqyndaldy.
Mınıstrlik basshylyǵy tasqyn kezeńinde avtomobıl joldarynyń jaǵdaıyn táýlik boıy baqylaýdy, sý deńgeıin jáne qaýipti ýchaskelerdi turaqty qadaǵalaýdy qamtamasyz etýdi tapsyrdy.
Zamanaýı ári qaýipsiz jol ınfraqurylymyn damytý baǵytyndaǵy jumystar júıeli túrde jalǵasatyn bolady.
Buǵan deıin 2030 jylǵa deıingi 1500 shaqyrym jol tórt jáne odan da kóp jolaqty bolatynyn jazdyq.