Bıyl 4 jel, 5 kún jáne 1 sý elektr stantsııasy paıdalanýǵa berilmek
ASTANA. KAZINFORM – Memleket basshysynyń jańartylatyn energııa kózderinen óndiriletin elektr energııasynyń kólemin 1,5 esege arttyrý jónindegi tapsyrmasyna sáıkes Energetıka mınıstrligi salany damytý baǵytynda júıeli jumystar júrgizip jatqanyn habarlady.
2025 jyldyń qorytyndysy boıynsha jańartylatyn energııa kózderi obektilerinde óndirilgen elektr energııasynyń kólemi 8,6 mlrd kVt·saǵatqa jetip, bul elimizdegi elektr energııasy óndirisiniń jalpy kóleminiń 7%-yna jetti.
Salystyrmaly túrde alǵanda, 2022 jyly JEK obektilerinde óndirilgen elektr energııasynyń kólemi 5,11 mlrd kVt·saǵat bolsa, onyń eldiń jalpy energııa teńgerimindegi úlesi 4,5% deńgeıinde boldy. Osylaısha, Memleket basshysynyń tapsyrmasy belgilengen mejeden asyra oryndaldy. Jańartylatyn energııa kózderinen óndiriletin elektr energııasynyń kólemi 2022 jylmen salystyrǵanda 1,7 eseden astam ósti. Qol jetkizilgen nátıjeler «jasyl» energetıkany damytýǵa baǵyttalǵan dáıekti memlekettik saıasattyń arqasynda múmkin boldy.
Ósimniń negizgi faktorlary qatarynda jańartylatyn energııa kózderi jobalaryn irikteý boıynsha aýktsıondyq saýda-sattyqtardy ótkizý, salaǵa ınvestıtsııalar tartý, sondaı-aq jańartylatyn energetıka obektilerin paıdalanýǵa berý bar.
2025 jyly jalpy qýaty 503,5 MVt bolatyn 9 jańartylatyn energııa kózi nysany paıdalanýǵa berildi. Bıyl jalpy qýaty 245 MVt bolatyn 10 JEK jobasyn iske asyrý josparlanyp otyr. Onyń ishinde 4 jel elektr stantsııasyn, 5 kún elektr stantsııasyn jáne 1 sý elektr stantsııasyn paıdalanýǵa berý kózdelgen.
Sý, káriz, jylý jáne elektr jelilerin jańǵyrtý boıynsha ulttyq jobada qandaı baǵdarlamalar qarastyrylǵanyn jazǵan edik.
