Bıyl 3700 shaqyrymnan astam jańa temirjol jelileri tóselip, paıdalanýǵa beriledi
ASTANA. KAZINFORM – Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda bıyl 3700 shaqyrymnan astam jańa temirjol jelileri tóselip, paıdalanýǵa beriletinin aıtty.
– Taǵy bir mańyzdy mindet – kólik-tranzıt salasyna qatysty. Biz elimizdiń osy baǵyttaǵy áleýetin birtindep nyǵaıta beremiz. Bul sharýa kommýnaldyq, energetıkalyq jáne sý salasyndaǵy ınfraqurylymdy jańǵyrtý jumysymen qatar júredi. Mysaly, byltyr 1500 shaqyrym temir jol salynyp, jóndeýden ótti. Bul da – rekordtyq kórsetkish. Bıyl 3700 shaqyrymnan astam jańa temirjol jelileri tóselip, paıdalanýǵa beriledi. Qazirgi tańda jolaýshylar úshin jańa baǵyttar ashylyp, vagondar parki jańartylyp jatyr. Sondaı-aq vokzaldar qaıta jóndeýden ótýde. Sebebi olar ortasha eseppen alǵanda 60 jyldan beri jumys istep tur. Tipti, elimizdegi on vokzal osydan bir ǵasyr buryn salynǵan. Jalpy, biz byltyr Qazaqstandaǵy 124 vokzaldy túgel jańǵyrta bastadyq. Bul jumys osy jyldyń sońyna deıin aıaqtalady. Mundaı aýqymdy bastama alǵash ret qolǵa alyndy. Aldyńǵy jyly kópten kútken Astana – Almaty kúre jolyn jóndeý jumystary tolyq bitti, - dedi Prezıdent.
Byltyr jalpy uzyndyǵy 13 myń, onyń ishinde jergilikti mańyzy bar 3 myń shaqyrym tas jol jóndeýden ótti. Bıyl taǵy 2300 shaqyrymǵa sozylatyn jergilikti joldar jańǵyrtylady.
– Men buǵan deıin Astanany elimizdiń batys aımaqtarymen baılanystyratyn múlde jańa avtokólik jolyn salýdy tapsyrdym. Qazir bul baǵytta naqty jumys júrgizilip jatyr. Árıne, keń jolaqty joldar elimiz úshin asa qajet. Degenmen jergilikti joldar da nazardan tys qalmaıdy. Sebebi mıllıondaǵan azamatymyz, sonyń ishinde aýyldaǵy aǵaıyn úshin avtokólik joly, shyn máninde, «ómir joly» sanalady. Sapaly jol bolsa, jurt turmys-tirshiligin jaqsartyp, bıznesin damyta alady. Byltyr jalpy uzyndyǵy 13 myń, onyń ishinde jergilikti mańyzy bar 3 myń shaqyrym tas jol jóndeýden ótti. Bıyl taǵy 2300 shaqyrymǵa sozylatyn jergilikti joldar jańǵyrtylady. Aldaǵy úsh jyldyń ishinde osyndaı 32 myń shaqyrym jol normatıvtik talapqa saı jóndeledi. Bul – Qazaqstannyń qurlyq shekarasynan úsh ese kóp qashyqtyq. Alaıda Úkimet jáne tıisti memlekettik mekemeler jol ınfraqurylymynyń sapasyna erekshe mán berýge tıis, - dedi Memleket basshysy.
Aıta keteıik, Kókshetaý, Semeı jáne Óskemende jańa jylý elektr ortalyqtary salynady.
