Bıyl 37 anımatsııalyq fılm stsenarııi qaralyp jatyr

ASTANA. KAZINFORM – Bıyl 37 anımatsııalyq fılm stsenarııi qaralyp jatyr. Bul jaıynda Senat depýtattarynyń saýalyna Premer-Mınıstr Oljas Bektenovtiń jaýabynda aıtylǵan.

«2019-2022 jyldar aralyǵynda memlekettik qarjylyq qoldaý boıynsha 8 anımatsııalyq fılm óndirildi. 2024 jyly 37 anımatsııalyq fılm stsenarııleri qaralyp jatyr. Sondaı-aq bıyldan bastap ulttyq dep atalýǵa úmitker kınojobalardy irikteý qaǵıdalaryna túbegeıli ózgeris engizilip, ulttyq fılmderdi irikteıtin Saraptama keńesinde anımatsııalyq kınojobalardy qarastyratyn sektsııa quryldy. Bul sektsııanyń músheligine anımatsııa salasynyń bilikti mamandary endi», - dep atap ótedi Úkimet basshysy.

Oljas Bektenovtiń atap ótýinshe, elimizdiń memlekettik ıdeıalogııalyq saıasatynyń iske asyrylýyna yqpal etý, bala tárbıesin, til máselesiniń oń sheshilýin qamtamasyz etý maqsatynda «Qazaqfılm» kınostýdııasynyń janynda «Qazaqanımatsııa» shyǵarmashylyq birlestigi qurylǵan. Onyń maqsaty – otandyq anımatsııalyq salany jańǵyrtý jáne anımatsııalyq fılmderdiń sapasy men ulttyq naqyshtaǵy mazmuny boıynsha halyqaralyq deńgeıge shyǵý jaǵdaılaryn qamtamasyz etý, sondaı-aq qysqa metrajdy jáne tolyq metrajdy anımatsııalyq fılmder shyǵarýdy ulǵaıtý. Sonymen qatar Qazaqstannyń anımatsııa kınostýdııalarynyń qaýymdastyǵy, «Qazaqstandyq anımatsııalyq kınostýdııalar qaýymdastyǵy» birlestigi bar. Olar tyǵyz baılanysta jumys isteıdi. Halyqaralyq anımatsııalyq fılmder qaýymdastyǵyna (ASIFA) múshe bolý máselesi aldaǵy ýaqytta qaralatyn bolady.

«Óz kezeginde «Balapan» telearnasy memleket bıýdjeti aıasynda sapaly TV kontentti 100 paıyz memlekettik tilde ǵana óndiredi. Jyl saıyn telebaǵdarlamalar men anımatsııalyq jobalar óndirisin ulǵaıta otyryp, telearna qazaq balalar kontentin damytý men nasıhattaýǵa eleýli úles qosyp keledi», - dedi Oljas Bektenov.