Bıyl 33 eskertkishke ǵylymı restavratsııalyq jumystar júrgiziledi
ASTANA. KAZINFORM – Elimizde tarıhı-mádenı obektilerge monıtorıng júrgizilip otyrady. Eskertkish, kesenelerdi saqtaý jáne ǵylymı restavratsııalyq jumystarǵa jergilikti jáne respýblıkalyq bıýdjetten qarjy bólinedi.
Mádenıet jáne aqparat mınıstrligi Mádenıet komıteti bizge usynǵan málimet boıynsha, búginde elimizde 25 myńnan asa tarıhı-mádenı mura obektileri bar. Onyń ishinde 12 myńnan astamy respýblıkalyq jáne jergilikti mańyzy bar tarıh jáne mádenıet eskertkishteriniń memlekettik tizimine engizilgen, al 13 myńǵa jýyǵy oblystardyń, respýblıkalyq mańyzy bar qalalardyń jergilikti atqarýshy organdardyń aldyn-ala esepke alatyn tarıhı-mádenı mura obektiler qatarynda. Ol degenimiz zerdeleýge jáne tıisti mártebesin aıqyndaýǵa jatatyn, jańadan anyqtalǵan tarıhı mádenı mura obektileri.
Aıta ketsek, tarıhı-mádenı obektilerdiń ishine eskertkishter, keseneler, monýmentter, tarıhı-mádenı keshender jatady.
«Qazaqstan Respýblıkasynyń «Tarıhı-mádenı mura obektilerin qorǵaý jáne paıdalaný týraly» Zańynyń 10 jáne 11-baptaryna sáıkes olardyń jaǵdaıyna monıtorıng júrgizilip otyrady. Monıtorıng aıasynda joǵaryda kórsetilgen memlekettik tizimderden saqtalý deńgeıi tómendegen, tehnıkalyq jaǵdaıy ǵylymı-restavratsııalyq jumystardy qajet etetin obektiler anyqtalyp jatsa, olarǵa ǵylymı-restavratsııalyq jumystar júrgizý jóninde memlekettik organdarǵa usynys joldanyp otyrady», - delingen mınıstrliktiń agenttik jibergen saýalǵa jaýabynda.
Vedomstvonyń aqparatynda aıtylǵandaı, jergilikti mańyzy bar tarıhı obektilerde ǵylymı-restavratsııalaý jumystaryn júrgizý tıisinshe jergilikti bıýdjetten, al respýblıkalyq mańyzy bar eskertkishterde respýblıkalyq bıýdjet esebinen júrgiziledi.
«Bıyl respýblıkalyq bıýdjetten barlyǵy 33 eskertkishke ǵylymı restavratsııalyq jumystar júrgizý qoldaý tapty. Onyń 9-y kesene, atap aıtqanda, Qoja Ahmet ıAsaýı, Asan-ata, Oqshy-ata, Shoqaı Datqa, Súıinbaı Aronuly, Syrlytam jáne Júsip ata kesenesi», - delingen habarlamada.
Buǵan deıin Mádenıet jáne aqparat mınıstrligi agenttik joldaǵan Joshy han kesenesiniń irgetasy nege dymqyl degen saýalǵa jaýap bergen edi.
Áleýmettik jeli qoldanýshysy Joshy han kesenesiniń qazirgi jaǵdaıy týraly jazba jarııalap, tarıhı dúnıege kóńil bólý qajettigin aıtty.
