Bıyl 32 pedofılge hımııalyq kastratsııa jasalǵan
Hımııalyq kastratsııa - bir rettik protsedýra emes, odan bólek kastratsııa jasaýǵa qarsy kórsetilimder bolýy múmkin. Densaýlyq saqtaý mınıstrligi mán-jaıdy túsindirdi, dep habarlaıdy Kazinform.
«Ótken jyly 30 pedofılge hımııalyq kastratsııa jasaldy. Al bıyl qyrkúıek aıynyń sońynda 32 adam hımııalyq kastratsııadan ótti. Hımııalyq kastratsııa — bir rettik protsedýra emes. Protsedýra sot sheshimimen taǵaıyndalady jáne patsıentke testosteron deńgeıin tómendetý úshin uzaq ýaqyt antıandrogendi preparat salynady», — delingen Densaýlyq saqtaý mınıstrliginiń Kazinform agenttigine bergen málimetinde.
Sonymen qatar mınıstrlikten pedofılge medıtsınalyq turǵydan qarsy kórsetilim bolǵan jaǵdaıda qandaı shara qoldanylatyny týraly túsinik berildi.
«Hımııalyq kastratsııa túrindegi májbúrlep emdeý — testosteron sıntezin tómendetý jáne retseptorlardy bloktaý arqyly jynystyq qumarlyqty tómendetetin antıandrogendi preparatty qabyldaý ǵana emes. Sonymen qatar psıhıatr dáriger oǵan jynystyq-róldik sáıkestikti qalyptastyrý, jańa jynystyq minez-qulyq pen pedofıldi almastyratyn jynystyq artyqshylyqty damytý jáne júzege asyrý maqsatynda psıhoterapııalyq kómek kórsetip, qadaǵalaıdy. Osylaısha antıandrogendi preparatty qoldanýǵa qarsy kórsetilim bolǵan jaǵdaıda ol únemi psıhıatr dáriger baqylaýynda bolyp, psıhoterapııalyq em alady», — deıdi vedomstvodan.