Bıyl 32 aýdan ákimi biliktiligin arttyrady
ASTANA. KAZINFORM – Bıyl 32 aýdan ákimi biliktiligin arttyrady. Bul týraly Májilis depýtattarynyń saýalyna Premer-Mınıstrdiń orynbasary Qanat Bozymbaevtyń jaýabynda aıtylǵan.
«Memlekettik qyzmet isteri agenttigi jyl saıyn «Jańa formatsııa basshysy» baǵdarlamasy aıasynda saıası qyzmetshiler úshin oqytý uıymdastyrady. Oqytýdyń negizgi maqsaty - memlekettiń keshendi strategııalyq mindetterin sheshý úshin saıası qyzmetshilerdiń basqarýshylyq quzyretterin jetildirý. Oqytý barysynda tyńdaýshylar basqarý qabiletin jetildirý, onyń ishinde strategııalyq oılaý, sheshim qabyldaý quzyrettilekterin damytý, ınnovatsııalyq tásilderdi paıdalanýdyń halyqaralyq tájirıbesin zertteý múmkindigine ıe», - dedi vıtse-premer jaýabynda.
Onyń atap ótýinshe, tyńdaýshylarǵa úzdik bıznes-sarapshylar, tájirıbeli professorlar men memlekettik jáne joǵary qazaqstandyq jáne halyqaralyq bilim berý uıymdarynyń ókilderi dáris beredi.
«Bıyl óńirlerden 32 aýdan ákimi jáne 11 apparat basshysy Prezıdent janyndaǵy Memlekettik basqarý akademııasy men Nazarbaev Ýnıversıtetinde oqýdan ótedi. Úkimet aýyldyq jerlerde ómir súrý sapasyn jaqsartý maqsatynda jergilikti atqarýshy organdardyń ashyqtyǵyn, jaýapkershiligin, eseptiligin arttyrý, bilim berý, mádenıet jáne sport ınfraqurylymyn keńeıtý jáne jaqsartý, sondaı-aq aýyldyq kásipkerlikti qoldaý boıynsha turaqty negizde jumys júrgizip jatqanyn atap ótý qajet», - dedi Qanat Bozymbaev.
