Bıyl 3 trln teńgege 234 ınvestıtsııalyq joba iske asyrylady
ASTANA. KAZINFORM – Bıyl 3 trln teńge somaǵa 234 ınvestıtsııalyq joba iske asyrylady. Bul týraly búgin Úkimet otyrysynda Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.
«Investıtsııalyq belsendilik serpindi ekonomıkalyq ósýdi qamtamasyz etý úshin úlken mańyzǵa ıe. Úkimet aldyna ınvestıtsııalar tartý boıynsha órshil mindetter qoıyldy. 2024 jyly jospar boıynsha negizgi kapıtalǵa 22,1 trln teńge ınvestıtsııalanady. Bul ótken jyldyń qorytyndysynan 22 paıyzǵa artyq. Investıtsııalyq jobalardyń biryńǵaı pýly aıasynda bıyl 2,3 trln teńge somaǵa 234 jobany iske asyrý josparlanǵan. Óńirlerdiń árbir ákimi men salalyq memlekettik organdardyń mınıstrine KPI bekitilgen. Investıtsııalyq shtab sheńberinde ınvestorlardyń máselelerin jedel retteý boıynsha sharalar qabyldanýda. Memleket basshysynyń tapsyrmasy boıynsha barlyq óńirlerdegi prokýrorlar pýlda turǵan jobalardy súıemeldeıdi. 37 kompanııany ornalastyrý jumystary jalǵasýda», - dedi ol.
Onyń atap ótýinshe, búgingi tańda ınvestıtsııalar tartý boıynsha birqatar tıimdi qural qoldanylady. Іri ınvestorlardy tartý úshin Basym qyzmet túrleriniń tizbesinen tyıym salynǵan tizimdi qalyptastyrýǵa kóshý jolymen Investıtsııalar týraly kelisim jasasý tetigi jetildirildi.
Búgingi tańda osyndaı 6 Kelisim jasaldy. Taýar óndirýshi kásiporyndarǵa salyq zańnamasynyń 10 jyl turaqty bolýyna kepildik beriletin ınvestıtsııalyq mindettemeler týraly kelisim jasasý múmkindigi beriledi. Investıtsııalar boıynsha salyq zańnamasynyń turaqtylyǵy kásiporyndarǵa ınvestıtsııalardyń qaıtarymdylyǵyn boljaýdy qamtamasyz ete otyryp, uzaq merzimdi kezeńge qarjylyq aǵyndardy josparlaýǵa múmkindik beredi. Búginde 6 ınvestıtsııalyq mindettemeler týraly kelisim jasaldy. Geologııalyq barlaýǵa ınvestıtsııalar tartý jáne Qazaqstannyń munaı-gaz salasynyń mıneraldyq-shıkizat bazasyn tolyqtyrý maqsatynda 2023 jyldan bastap Jaqsartylǵan modeldik kelisimshart jasasý kezinde fıskaldyq yntalandyrý engizildi.
«AEA tıimdiligin arttyrý boıynsha sharalar qabyldanyp jatyr. Atap aıtqanda, barlyq ınvestıtsııalyq mindettemeler oryndalǵannan keıin Arnaıy ekonomıkalyq aımaq qatysýshylary úshin jer ýchaskesin satyp alý múmkindigi kózdelgen. Aralas rejımdi aýmaqtar aıqyndaldy. Bul jerde basym jobalar AEA rejıminde jeńildikter alady. Al basymdyqtardan tys jobalardy iske asyrýdy josparlap otyrǵandar ınfraqurylym ǵana alatyn bolady. Sondaı-aq AEA qatysýshylary úshin «ınvestıtsııalar neǵurlym kóp bolsa, jeńildikter soǵurlym kóp» qaǵıdaty boıynsha salyqtyq jeńildikter berýdiń saralanǵan tásili engizildi», - dedi Nurlan Baıbazarov.
