Bıyl 3 oblysta gazben júretin kólikterge arnalǵan kompressorlyq stansalar ashylady
ASTANA. KAZINFORM — Energetıka mınıstrliginiń alqa májilisinde QazaqGaz ulttyq kompanııasynyń basshysy Álibek Jamaýov el aýmaǵynda gazben júretin kólikterge arnalǵan kompressorlyq stansalardyń jelisi keńeıtile beretinin aıtty.
— Qazir el aýmaǵynda 24 avtomobıldi gaz toltyrý kompressorlyq stantsııasy, onyń ishinde QazaqGaz-dyń 7 stantsııasy bar. Bıyl QazaqGaz Onimderi franshızasy boıynsha Almaty, Taraz qalalarynda jáne Jetisý oblysynda 4 gaz toltyrý stantsııasy ashylady, — dedi ol.
Sondaı-aq, ol mundaı stansalar halyqaralyq joldardyń boıynan oryn tebetinin atap ótti.
— Avtomatty gaz toltyrý kompressorlyq stantsııalaryn «Batys Eýropa-Batys Qytaı» trassasynda da salý úshin jeke ınvestıtsııalar tartýdy jalǵastyramyz, — dedi QazaqGaz basshysy.
Eske salsaq, qańtarda Ulttyq qaýipsizdik komıteti «QazaqGaz Aimaq» AQ Jetisý óndiristik fılıalynyń dırektory Aıbek Erǵalıdiń ustaǵan bolatyn.