Bıyl 3 myń elordalyq qazaq tilin tegin úırenedi

ASTANA. KAZINFORM — Bıyl elordada 3 myń turǵyn qazaq tilin tegin úırene alady. Bul týraly Astana qalalyq tilderdi damytý jáne arhıv isi basqarmasynyń basshysy Sáken Esirkep aıtty.

— Ótken jyly 1 500-ge jýyq qala turǵynyn ártúrli deńgeı boıynsha memlekettik tilge tegin oqyttyq. Bıyl qazaq tilin oqıtyn turǵyndar sanyn 3 myńǵa ulǵaıtyp otyrmyz. Sonymen qatar kásipkerlerge arnalǵan ıntensıv qazaq tili kýrstary bar. Oqytýshylarymyz «Astanalyq bazar», «Central Market» sııaqty iri saýda oryndaryna baryp, olardyń qajettilikterine sáıkes qyzmet kórsetýshilerdiń tutynýshylarmen aradaǵy bazalyq dıalog túrin úıretemiz, — dedi ol qalalyq máslıhattyń áleýmettik-mádenı damý máseleleri jónindegi turaqty komıssııanyń otyrysynda.

Onyń atap ótýinshe, qaladaǵy kóshelerdiń 93 paıyzdaıy tarıhı tulǵalarymyz ben jer-sý ataýlarynyń qurmetine qoıylǵan. 60 mektepke ult qaıratkerleriniń esimi berilgen. Olardy ulyqtaý baǵytynda únemi ǵylymı konferentsııa, dáris, dóńgelek ústel, dárister ótkizilip turady. Sonymen qatar ol jarnamalardy memlekettik tilge sáıkes keltirý máselesine toqtaldy.

— Ár aıda Atameken kásipkerler palatasy bazasynda qaladaǵy kásip ıelerimen turaqty kezdesý ótkiziledi. Olarǵa jarnama, til zańdarynyń talaptary túsindiriledi. Ótken jyly tek jarnama ilýshi kásipkerlerden 3 741 eskız jobasyn qabyl alyp, onyń 81 paıyzyna tıisti túzetýler engizip, kelisim berdik. Bıyl jyl basynan beri «Eýrazııa», «Central Market» syndy saýda oıyn-saýyq ortalyqtarynda reıd júrgizdik. 400-den astam sýbekt qamtydyq. Zańǵa qaıshy keletin nemese tujyrymdamalarǵa sáıkes kelmeıtin jarnamalardy alyp tastadyq, — dedi Sáken Esirkep.

Aıta ketelik qazaq tili úshin jańa tsıfrlyq platforma jasalady. Sonymen qatar 1,7 mln oqýshy qazaq tili men ádebıetinen emtıhan tapsyrady.