Bıyl 3 myń áskerı mindetti áskerı jıynǵa shaqyrylady
ASTANA. KAZINFORM – Qazaqstanda qarýly kúshterdi daıyndaý josparyna sáıkes, áskerı mindettilermen kezekti áskerı jıyn ótkizý josparlanyp otyr. Bul týraly QR Qarýly kúshter Bas shtaby bastyǵynyń orynbasary, general-maıor Sáken Júsipov aıtyp berdi.
Jıyn ótkizýdiń negizgi maqsaty – beıbit ýaqytta qysqartylǵan quramda ustalatyn áskerı bólimderdiń jaýyngerlik jáne jumyldyrý ázirligin arttyrý, jumyldyrý kezinde áskerdi óristetý úshin áskerı oqytylǵan resýrs daıarlaý olardy zapasta ustaý.
«Áskerı jıyn jyl saıyn ótkiziledi, onyń uzaqtyǵy 30 kún. Byltyr jıynǵa 1500 adam shaqyrylǵan edi. Bıyl shaqyrylatyn adamdar sany 3 myńǵa deıin ósti. Adam sanyn ulǵaıtý olardy ásker úshin qajetti áskerı-eseptik mamandyqtar boıynsha daıarlaý arqyly áskerı oqytylǵan rezerv jınaýǵa baılanysty. Áskerı jıynnan ótý áskerı mindettilerdiń mamandyqtary boıynsha alǵan daǵdysyn qalypqa keltirýge múmkindik beredi», - dedi Sáken Júsipov OKQ alańynda ótken baspasóz konferentsııasynda.
Qoldanystaǵy zańda áskerı jıynǵa shaqyrylatyn adamnyń shekti jasy aıqyndalǵan, ıaǵnı qatardaǵy jaýyngerler men serjanttar úshin – 50 jas; ofıtserler úshin – 60 jas.
«Áskerı jıynǵa densaýlyq jaǵdaıy boıynsha jaramdy áskerı mindettiler shaqyrylady, sondyqtan olar aldyn ala medıtsınalyq tekserýden ótedi. Olardy jıyn ótkiziletin jerge jetkizý jáne odan keri qaıtarý Qorǵanys mınıstrliginiń qarajaty esebinen temir jol nemese avtomobıl kóligimen júrgizilmek. Jıyn oqý-jattyǵý polıgonynda ótkiziledi, áskerı mindettiler dalalyq lagerde bolady», - deıdi spıker.
Áskerı jıynǵa shaqyrylǵan azamattar áskerı qyzmetshiler sııaqty kıim-keshekpen, tamaqpen jáne medıtsınalyq qyzmet kórsetýmen qamtamasyz etiledi.
Áskerı jıyn kezinde áskerı mindettilerdiń jumys orny, atqaratyn laýazymy saqtalady, olarǵa memleket esebinen ortasha jalaqy, al jumys istemeıtin azamattarǵa eń tómengi jalaqy beriledi.
Sonymen qatar, jıynǵa shaqyrylǵan áskerı mindettiler jıyn kezinde áskerı qyzmetshi dárejesinde bolady. Bul rette olar QR Zańdarynyń jáne jalpy áskerı jarǵynyń talaptaryn saqtaýǵa tıis.
