Bıyl 3 mıllıonnan astam balany jazǵy demalyspen qamtý josparlanyp otyr
ASTANA.KAZINFORM - Oqý-aǵartý mınıstrligi balalardyń qaýipsiz, sapaly ári mazmundy jazǵy demalysyn uıymdastyrý boıynsha keshendi jumysty jalǵastyryp jatqanyn málimdedi.
2026 jyly jazǵy demalys jáne saýyqtyrý sharalarymen 3 mıllıonnan astam balany qamtý josparlanyp otyr. Onyń ishinde 600 myńǵa jýyǵy – áleýmettik osal sanattaǵy balalar.
Jazǵy demalysty uıymdastyrý kezinde bilim berý jáne tárbıelik baǵdarlamalardyń mazmunyna erekshe kóńil bólinedi. Olar «Adal azamat» biryńǵaı tárbıe baǵdarlamasy, «Zań jáne tártip» bastamasy, sondaı-aq Memleket basshysy Qasym-Jomart Toqaevtyń «Taza Qazaqstan» ekologııalyq bastamasy aıasynda júzege asyrylatyn «Jasyl sabaqtar» jobasy sheńberinde iske asyrylyp jatyr.
Balalardyń qaýipsizdigin qamtamasyz etý negizgi basymdyqtardyń biri bolyp qala beredi.
Memleket basshysynyń tapsyrmasy boıynsha balalardy qabyldaıtyn saýyqtyrý uıymdaryna qoıylatyn talaptar kezeń-kezeńimen kúsheıtilip jatyr. Osy baǵyttaǵy mańyzdy sheshimderdiń biri – jyl boıy jáne maýsymdyq jumys isteıtin bilim berý-saýyqtyrý ortalyqtaryna biryńǵaı lıtsenzııalyq talaptardyń engizilýi.
Lıtsenzııalyq talaptar sanıtarııalyq-epıdemıologııalyq normalardyń, órt jáne terrorızmge qarsy qaýipsizdik talaptarynyń saqtalýyn, qaýipsizdik júıeleriniń bolýyn, materıaldyq-tehnıkalyq bazanyń belgilengen standarttarǵa sáıkestigin, bekitilgen bilim berý-saýyqtyrý baǵdarlamalarynyń bolýyn, sondaı-aq bilikti pedagogıkalyq jáne medıtsınalyq kadrlarmen qamtamasyz etilýin qamtıdy.
Búgingi tańda 45 ortalyq lıtsenzııa aldy. Taǵy 60-tan astam ótinim bilim berý salasynda sapany qamtamasyz etý jónindegi aýmaqtyq departamentterdiń qaraýynda.
Lıtsenzııalaý tetigi balalardyń qaýipsizdigin qamtamasyz etýge, bilim berý-saýyqtyrý ortalyqtarynyń qyzmetine biryńǵaı talaptar qalyptastyrýǵa jáne kórsetiletin qyzmetterdiń sapasyn arttyrýǵa múmkindik beredi.
Aıta keteıik, Qazaqstanda 172 jazǵy lager qaýipsiz dep tanyldy.
