Bıyl 23,7 mln gektar jerge aýyl sharýashylyǵy daqyldary egildi

ASTANA. KAZINFORM — Qazaqstanda 2025 jylǵy kóktemgi egis jumystary tolyq aıaqtaldy. Bul týraly AShM málimdedi.

Memlekettik qoldaý sharalarynyń, dıqandar men jergilikti ákimshiliktiń úılesimdi jumysynyń arqasynda egis der kezinde júrgizildi.

Aıta ketý kerek, bıyl egis jumystaryn qarjylandyrý alǵash ret dala jumystarynan alty aı buryn bastaldy. Jalpy qarjylandyrý kólemi 700 mlrd teńgeni qurady.

Dıqandardyń jeńildetilgen qarjyǵa qoljetimdiligin arttyrý maqsatynda qaryz somasynyń 85%-na deıin kepildik berý mehanızmi iske qosyldy.

- Aýyl sharýashylyǵy tehnıkasyn jeńildetilgen lızıng arqyly alý kólemi 250 mlrd teńgeni qurady. Bul mashına-traktor parkin jańartýǵa jáne kóktemgi dala jumystaryn agrotehnıkalyq merzimderde, joǵary tehnologııalyq tıimdilikpen júrgizýge eleýli áser etti.

Aldyn ala málimetterge sáıkes, aýyl sharýashylyǵy daqyldary 23,7 mln gektar jerge ornalastyryldy, - delingen aqparatta.

Sonymen qatar, egistik alqaptardyń qurylymyn ártaraptandyrýǵa erekshe nazar aýdaryldy. Bul rette egin aınalymynyń ǵylymı negizdelgen normalary, klımattyq táýekelderge tózimdilik jáne naryqtyq úrdister eskerildi.

Nátıjesinde, ónimdiligi joǵary jáne suranysqa ıe daqyldardyń egis kólemi ulǵaıdy: maıly daqyldar – 3,4 mln gektar (ótken jylmen salystyrǵanda 0,5 mln gektarǵa artyq), mal azyqtyq daqyldar – 3,3 mln gektar (114 myń gektarǵa artty), dándik júgeri – 167,5 myń gektar, kókónis-baqsha daqyldary – 222,3 myń gektar.

Atalǵan egis alqaptary eldiń ishki qajettilikterin qamtamasyz etip qana qoımaı, agroónerkásiptik keshenniń eksporttyq áleýetin arttyrýǵa múmkindik beredi.

Aıta keteıik, bıyl 580 myń tonnaǵa jýyq erte pisetin kókónis jınalady.