Bıyl 2,3 mln tonna tyńaıtqysh sebý josparlanǵan
ASTANA. KAZINFORM – Qazir el óńirlerine 1,1 mln tonna tyńaıtqysh jóneltildi. Bul týraly Úkimet otyrysynda Aýyl sharýashylyǵy vıtse-mınıstri Azat Sultanov málim etti.
- Agrotehnologııalyq is-sharalardyń mańyzdy elementteriniń biri - ǵylymı negizdelgen normalarǵa sáıkes mıneraldyq tyńaıtqyshtardy engizý. Bıyl 2,3 mln tonna tyńaıtqysh sebý josparlanǵan. Búginde ákimdikterdiń jedel derekterine sáıkes, 1,3 mln tonnaǵa jýyq kelisimshart jasalyp, onyń 1,1 mln tonnasy jóneltildi. Jalpy, otandyq tyńaıtqyshtardyń kepildi kólemin qamtamasyz etý maqsatynda zaýyttardyń arnaıy shottaryna bekitilgen qarjylandyrý josparlaryna sáıkes qarajat aýdarylyp jatyr. Osyǵan baılanysty Ónerkásip jáne qurylys mınıstrliginen tyńaıtqyshtardy josparlanǵan kólemnen tómen emes deńgeıde jóneltýdi qamtamasyz etýdi suraımyz, - dedi A.Sultanov.
Onyń paıymynsha, ákimdikter tuqym tańdaý, egis merzimderin saqtaý, tyńaıtqyshtardy paıdalaný, topyraqty egis aldyndaǵy óńdeý jáne basqa da qajetti agrotehnıkalyq is-sharalardyń ýaqytyly ári sapaly oryndalýyna erekshe nazar aýdarýy qajet.
Budan buryn habarlanǵandaı, Aýyl sharýashylyǵy vıtse-mınıstri Azat Sultanov shegirtke zııankesterine qarsy hımııalyq óńdeý jumystary kórshi eldermen birlese júzege asatynyn aıtty.
