Bıyl 2,3 mln bala profılaktıkalyq tekserýden ótti – Aqmaral Álnazarova
ASTANA. KAZINFORM – Bıyl 2,3 mln bala profılaktıkalyq tekserýden ótti. Bul týraly búgin Úkimet otyrysynda Densaýlyq saqtaý mınıstri Aqmaral Álnazarova aıtty.
- Sońǵy 3 jylda mektepterdegi medıtsınalyq pýnktterdiń jaraqtandyrylýy men qyzmetkerlermen qamtylý deńgeıi 95 paıyzǵa deıin ulǵaıdy. 2026 jyldyń birinshi jartyjyldyǵynda 2,3 mln bala, ıaǵnı jyldyq jospardyń 52 paıyzy profılaktıkalyq tekserýden ótti, qalǵandary jyl sońyna deıin ótedi. Patologııasy anyqtalǵan balalardyń dınamıkalyq qaraýǵa jatatyn 36 paıyzy tolyǵymen baqylaýǵa alyndy, - dedi ol.
Mınıstrdiń aıtýynsha, 2025 jyldan bastalǵan «Bolashaqqa saý tispen» jol kartasy aıasynda stomatologııalyq kabınetter sany 145-ten 288-ge deıin ulǵaıtyldy. Bilim berý uıymdaryndaǵy profılaktıka men aýyz qýysynyń gıgıenasy daǵdylaryn qalyptastyrý jaqsardy.
- Alǵash ret barlyq balaǵa aýrýlardy erte anyqtaý úshin mektepterdiń medıtsınalyq pýnktterinde tsıfrlyq dıagnostıkalyq qurylǵylar qoldanylady. Ótken jyly qurylǵan Balalardyń tsıfrlyq tizilimi profılaktıkalyq tekserý men qaýip faktorlaryn erte anyqtaýdan bastap medıtsınalyq marshrýt, mamanǵa joldaý jáne dınamıkalyq baqylaýǵa deıin 54 kórsetkishke kúndelikti monıtorıng júrgizýdi qamtamasyz etedi, - dedi ol.
Aıta keteıik, Úkimet otyrysynda Mınıstrler kabınetiniń músheleri jańa oqý jylyna daıyndyq barysyn talqyǵa saldy.
