Bıyl 22,5 myń jumys ornyn ashatyn 190 ındýstrııalyq joba iske asyrylady — mınıstr

ASTANA. KAZINFORM — Bıyl elimizde 22,5 myń jańa jumys ornyn ashatyn 190 ındýstrııalyq joba iske asyrylady. Bul týraly QR Ónerkásip jáne qurylys mınıstri Ersaıyn Naǵaspaev aıtty.

— 2025 jyly shamamen 1,5 trıllıon teńgeniń 190 ındýstrııalyq jobasyn iske qosý kózdelip otyr. Bul 22,5 myń jańa jumys ornyn ashýǵa jáne otandyq ekonomıkadaǵy óńdeý ónerkásibiniń pozıtsııasyn nyǵaıtýǵa múmkindik beredi. Basymdyq beriletin salalar — metallýrgııa, mashına jasaý, hımııa ónerkásibi jáne basqa da joǵary qosylǵan quny bar ónim shyǵaratyn salalar, — dep málimdedi mınıstr «Kazahstanskaıa pravda» basylymyna bergen suhbatynda. 

Sondaı-aq ol jańa jobalardy júzege asyrý, óndiristi jergiliktendirýdi yntalandyrý, eksportqa baǵyttalǵan salalardy damytý basym baǵyt ekenin atap ótti.

— Ónerkásip salasyndaǵy bıznesti yntalandyrý úshin memleket 800 mıllıard teńge bólýdi qarastyrdy, onyń ishine ónerkásip alańdaryn qurý jobalaryna jeńildetilgen qarjy bólý de kiredi. Importty almastyrý baǵytynda ımportqa táýeldilikti tómendetý jáne ishki qosylǵan qun tizbegin qalyptastyrý boıynsha júıeli jumys jalǵasyp jatyr. Eksportty damytý úshin syrtqy naryqtardy keńeıtý jáne qazaqstandyq óndirýshilerdi shetelde qoldaý sharalary júrgizilip jatyr, — dedi Ersaıyn Naǵaspaev.

Buǵan deıin 3 jyl ishinde elimizde 4,7 trln teńgeniń ındýstrııalyq jobasy iske asyrylatynyn jazǵan edik.