Bıyl 22 myńnan astam adam kásiptik oqýmen qamtyldy

ASTANA. KAZINFORM — 1 sáýirdegi jaǵdaı boıynsha biliktilikti arttyrý jáne jańa mamandyqtardy ıgerý maqsatynda kásiptik oqýmen 22 051 adam qamtyldy. Bul týraly Eńbek jáne halyqty áleýmettik qorǵaý mınıstrligi málim etti.

Qysqa merzimdi oqytý jumyssyz azamattarǵa birneshe aı ishinde eńbek naryǵynda suranysqa ıe kásibı bilim men daǵdylardy meńgerýge múmkindik beredi.

Oqytý kelesi nysandarda uıymdastyrylady:

• oqý uıymdarynda (kýrstar jumys berýshilerdiń ótinimderi negizinde qalyptastyrylady);
• tikeleı jumys berýshilerdiń jumys oryndarynda;
• suranysqa ıe kásipter tizbesi boıynsha onlaın formattaǵy Skills Enbek qysqa merzimdi oqytý portalynda.

Oqytý uzaqtyǵy 6 aıdan aspaıdy jáne alynatyn biliktiliktiń erekshelikterin eskere otyryp aıqyndalady.

Óńirlik bóliniste oqýǵa joldanǵandardyń eń kóp sany Aqtóbe oblysynda — 2,6 myń adam, Shymkent qalasynda — 2,3 myń adam, Túrkistan jáne Qyzylorda oblystarynda — árqaısysynda 1,6 myń adam, sondaı-aq Qostanaı oblysynda — 1,5 myń adam tirkeldi.

— 2026 jylǵy 1 sáýirdegi jaǵdaı boıynsha mansap ortalyqtary arqyly oqý uıymdaryna kásiptik oqýǵa 163 adam joldandy, olardyń ishinde 10 adam oqýdy aıaqtady. Oqý qorytyndysy boıynsha 9 adam jumysqa ornalastyryldy, — delingen vedomstvonyń habarlamasynda.

Jumys berýshilerdiń jumys ornynda oqytý tájirıbeli qyzmetkerler qatarynan tálimger bekitý arqyly uıymdastyrylady. Oqytý kezeńinde jumys berýshi men jumyssyz azamat arasynda eńbek sharty jasalady. 20 aılyq eseptik kórsetkish mólsherindegi jalaqy mansap ortalyǵy tarapynan oqıtyn azamattyń shotyna qarajat aýdarý arqyly tólenedi. 2026 jyldyń basynan beri oqytýdyń osy túrimen 288 adam qamtyldy.

Skills Enbek portaly arqyly 2026 jyly onlaın-oqýmen 21,6 myń jumyssyz azamat qamtyldy.

Eń suranysqa ıe mamandyqtar:

— aspaz — 78 adam;

— tiginshi — 50 adam;

— býhgalter-kassır — 28 adam;

— shashtaraz — 26 adam;

— aýyl sharýashylyǵy óndirisiniń traktorshy-mashınısi — 25 adam;

— manıkıýr sheberi — 24 adam;

— shashtaraz-stılıst — 22 adam.

Eske salaıyq, qysqa merzimdi kásiptik oqýdan ótý úshin turǵylyqty jeri boıynsha mansap ortalyǵyna, al aýyldyq jerlerde — kentter, aýyldyq okrýgter jáne aýdandyq mańyzy bar qalalar ákimderine júginý qajet.

Kásiptik oqýdan ótetin azamattarǵa memlekettik qoldaý sharalary kórsetiledi: oqý aqysy tólenedi, stıpendııa nemese jalaqy beriledi, sondaı-aq jol júrý shyǵyndary óteledi.

Turǵylyqty jerinen tys oqyǵan jaǵdaıda turýǵa materıaldyq kómek (turǵyn úıdi jaldaý shyǵyndaryn óteý) qarastyrylǵan.

Buǵan deıin 36 myńnan astam qazaqstandyq Skills Enbek platformasynda oqyǵanyn jazdyq.