Bıyl 22 myń jol apaty tirkelip, 2 myń adam qaza boldy - Ákimshilik polıtsııa komıteti
ASTANA. KAZINFORM – 2024 jyly elimizde 22 myńnan astam jol apaty tirkelip, onda 2 myń adam qaza boldy. QR ІІM Ákimshilik polıtsııa komıtetiniń tóraǵasy Qaısar Sultanbaev osylaı málem etti.
«Joldaǵy jaǵdaıdy turaqtandyrý maqsatynda mınıstrlik keshendi sharalardy uıymdastyrýda. Degenmen, taldaý kórsetkendeı olar jetkiliksiz bolyp otyr. 2024 jyly 22 myńnan astam jol apaty tirkelip, onda 2 myń adam qaza taýyp, 25 myńnan astam adam jaraqat alyp otyr. Jol apatynan jaraqat alǵandar kórsetkishteriniń ósýi jol kólik oqıǵalaryn esepke alý tásiliniń ózgerýimen de baılanysty. Qazir densaýlyqqa keltirilgen zııanǵa qaramastan jol apatynan keıin medıtsınalyq mekemege júgingen barlyq adam esepke alynýda», - dedi Ákimshilik polıtsııa komıtetiniń tóraǵasy OKQ alańynda ótken baspasóz máslıhatynda.
Spıkerdiń aıtýynsha, joldaǵy adam shyǵyny apattyń negizgi úsh túrine baılanysty:
1. Avtokólikterdiń betpe-bet soqtyǵysýy;
2. Jaıaý júrginshilerdi qaǵyp ketý;
3. Kóliktiń aýdarylýy.
Osy sebepterden bolǵan adam shyǵyny jalpy jol apatynda qaza tapqandardyń 73 paıyzyn quraıdy. Apattyń osy úsh túriniń negizgi sebebi — jyldamdyqty arttyrý.
Sondaı-aq, komıtet basshysy joldaǵy jaǵdaıdy baqylaý aıasynda polıtsııa tarapynan júıeli sharalar qabyldanyp jatqanyn, «Qaýipsiz jol», «Avtobýs», «Avtokólik», «Abaılańyz, balalar!» sekildi jedel profılaktıkalyq sharalar ótkizilip turatynyn aıtty.
