Bıyl 20,2 mln sharshy metr baspana tapsyrylady - Úkimet
ASTANA. KAZINFORM – Jyl basynan 3,9 mln sharshy metr turǵyn úı paıdalanýǵa berildi. Bul týraly Úkimet otyrysynda 3 aıdyń áleýmettik-ekonomıkalyq damý qorytyndysyn talqylaý kezinde Ónerkásip jáne qurylys mınıstri Ersaıyn Naǵaspaev málim etti.
- Qurylys salasynda úsh aıdyń qorytyndysy boıynsha jumys kólemi shamamen 1,2 trln teńgeni qurap, ótken jylmen salystyrǵanda 14,8 paıyzǵa artty. Jalpy, óńirlerdiń basym bóliginde oń ósý dınamıkasy baıqaldy. Bul salanyń júıeli túrde damyp, josparlanǵan sharalardyń tıimdi iske asyrylyp jatqanynyń nátıjesi. Kórsetkishterdiń tómendeýi tek Aqmola, Soltústik Qazaqstan, Abaı men Jetisý oblystarynda tirkeldi, - dedi E. Naǵaspaev.
Onyń aıtýynsha, esepti kezeńde 3,9 mln sharshy metr turǵyn úı paıdalanýǵa berildi. Bul kórsetkish byltyrmen salystyrǵanda 3,8 paıyzǵa joǵary. Ósim 18 óńirde baıqaldy. Eń joǵary kórsetkish Abaı, Qaraǵandy oblysynda jáne Shymkent qalasynda. Al Atyraý jáne Aqmola oblystarynda tómendeý kórsetkish tirkeldi.
- Salada oń dınamıkany saqtaý maqsatynda bıyl turǵyn úıdi paıdalanýǵa berý kólemin 20,2 mln sharshy metrge jetkizý josparlanǵan. Ol úshin 20 myń jalǵa beriletin páter satyp alýǵa 332 mlrd teńge bólý, sondaı-aq jetispeıtin ınjenerlik ınfraqurylymdy júrgizýge 184 mlrd teńge qajet. Alaıda qarajattyń qaıtarylýyna qatysty máselelerdiń tolyq sheshim tappaýyna baılanysty, qazirgi qarjylandyrý jaǵdaıynda turǵyn úıdi paıdalanýǵa berý kólemi 18,5 mln sharshy metr deńgeıinde boljanyp otyr. Osyǵan baılanysty ákimdikterdiń qaryz alý shekteýlerin eskere otyryp, jergilikti bıýdjetterge oblıgatsııalar boıynsha negizgi qaryzdy óteý jáne paıyzdy tóleý shyǵyndaryn jabý tetigin qarastyrý qajet nemese bul shyǵyndardy respýblıkalyq bıýdjet esebinen óteý múmkindigin qarastyrý usynylady, - dedi mınıstr.
Budan buryn habarlanǵandaı, kúrdeli syrtqy ekonomıkalyq ahýalǵa qaramastan shıkizattyq emes sektor básekege qabilettiligin kórsetti.
