Bıyl 2000 shaqyrymnan astam sý qubyry jóndelip, jańadan salynady

ASTANA. KAZINFORM — Sý resýrstary jáne ırrıgatsııa mınıstrligi bıyl sý qubyryn salý jáne rekonstrýktsııa boıynsha 28 jobany iske asyra bastady. Bul jumystyń nátıjesinde 1,1 mln turǵyny bar 426 eldi mekende aýyz sýmen qamtamasyz etý sapasy jaqsarady. 

Jańadan salynatyn jáne rekonstrýktsııadan ótetin toptyq sý qubyrlarynyń jalpy uzyndyǵy 2000 shaqyrymnan asady. Qurylys jumystary elimizdiń 9 óńirinde júrip jatyr.

Budan bólek, bıyl Qazaqstanda 96 gıdrotehnıkalyq qurylys jóndeledi. Jóndeý jumystary elimizdiń on óńirindegi nysandarda júrgiziledi.

Mınıstrlik tasymaldaý kezindegi sý shyǵynyn 50%-dan 25%-ǵa deıin azaıtý arqyly 2030 jylǵa qaraı sýarmaly jer aýmaǵyn 2,5 mln gektarǵa deıin ulǵaıtýdy josparlap otyr. 

Sondaı-aq qolda bar sý resýrstaryn 2,4 tekshe shaqyrymǵa arttyryp, ekonomıka salalaryn turaqty sýmen qamtamasyz etý úshin gıdrotehnıkalyq qurylystardyń jaı-kúıin jaqsartýǵa, tótenshe jaǵdaılardyń týyndaý qaýpin azaıtýǵa nıetti.

Budan bólek, mınıstrlik Almaty, Jambyl, Qyzylorda jáne Túrkistan oblystarynda 3500 shaqyrym sýarý jelilerin tsıfrlandyrý boıynsha jumys júrgizip jatyr.

Atap aıtqanda, Qyzylorda oblysynda 2609 shaqyrym sýarý kanalyn avtomattandyrý josparlanyp otyr.

17 nysan boıynsha jobalaý-smetalyq qujattama ázirlený ústinde.