Bıyl 20 mln sharshy metrge tarta baspana tapsyrylady

ASTANA. KAZINFORM — Bıyl 19,2 mln sharshy metr turǵyn úı paıdalanýǵa beriledi. Bul týraly Májilis janyndaǵy Qoǵamdyq palata otyrysynda Ónerkásip jáne qurylys vıtse-mınıstri Qýandyq Qajkenov málim etti.

- Jańa turǵyn úı qurylysy memlekettik saıasattyń mańyzdy baǵyty sanalady. 2023 jyldan bastap 2024 jyldy qosa eseptegende josparlanǵan 30,8 mln sharshy metrdiń ornyna 36,9 mln sharshy metr turǵyn úı paıdalanýǵa berildi (2023 jyly 17,8 mln sharshy metr jáne 2024 jyly 19,1 mln sharshy metr). Osy oraıda eki jyldyq kezeńde (2023-2024 jyldar) qabyldanǵan sharalar Prezıdenttiń saılaýaldy baǵdarlamasynyń josparynan 6,1 mln sharshy metrge artyq oryndaýǵa múmkindik berdi, - dedi Q. Qajkenov. 

Onyń aıtýynsha, bıyl el boıynsha 19,2 mln sharshy metr turǵyn úıdi paıdalanýǵa berý josparlanǵan. Osy jyldyń 10 aıynda 14,6 mln sharshy metr tapsyryldy. Bul 2024 jyldyń sáıkes kezeńimen salystyrǵanda 4,5 paıyzǵa artyq.

- Búginde Prezıdenttiń saılaýaldy baǵdarlamasyn iske asyrý josparynyń oryndalýy (111 mıllıon sharshy metr turǵyn úı kóleminde) 46,4% nemese 51,5 mln sharshy metrdi qurady, - dedi vıtse-mınıstr.

Atap aıtqanda, saılaýaldy baǵdarlamasynda jeti jylda 111 mln sharshy metr baspana salý eskerilgen. Bul turǵyda jyl saıyn kem degende orta eseppen 15-16 mln sharshy metr paıdalanýǵa berilýi tıis. 

Budan buryn habarlanǵandaı, memleket turǵyn úı kómegin berý erejelerin jańartty.