Bıyl 2 mln ga paıdalanylmaǵan jerdi memlekettik menshikke qaıtarý josparlanýda
ASTANA. KAZINFORM - QR AShM Jer resýrstaryn basqarý komıteti 2025 jyly 2 mln ga paıdalanylmaǵan aýyl sharýashylyǵy jerlerin memleket menshigine qaıtarý jóninde sharalar qabyldaıtyn bolady.
Sondaı-aq, basqa da negizgi baǵyttar boıynsha jumystar jandanbaq.
Memleket basshysynyń Bakýdegi Klımattyq sammıtte aıtqan bastamalarynyń jalǵasynda kómirtekti eginshilikti damytý jónindegi jol kartasy ázirlenip, bekitiletin bolady. Bul klımattyń ózgerýimen kúresýdegi jáne topyraq qunarlylyǵyn arttyrýdaǵy mańyzdy qadam.
«2024-2030 jyldarǵa arnalǵan topyraq qunarlylyǵyn qalpyna keltirý jáne arttyrý jónindegi jol kartasyn iske asyrý jalǵastyrylatyn bolady. Qujat 2024 jyly bekitildi. Aǵymdaǵy jyly jerdiń tozýyna qarsy kúreske basa nazar aýdara otyryp, Jol kartasyn iske asyrý jónindegi óńirlik is - qımyl josparlaryn bekitýge erekshe nazar aýdarylatyn bolady», - dep habarlady JRBK tóraǵasy Murat Temirjanov.
Sondaı-aq Komıtet zańnamalyq bazany jetildirý jóninde sharalar qabyldaıtyn bolady.
Atap aıtqanda, múddeli memlekettik organdarmen birlesip Parlamentte qaralyp jatqan "topyraqty qorǵaý týraly" zań jobasyn odan ári ilgeriletý jóninde sharalar qabyldanatyn bolady. Bul topyraqty qorǵaý, olardyń sapasy men qunarly qabatyn saqtaý máselelerin retteýdegi negizgi qujat bolady.
Buǵan deıin eldegi eń iri úsh latıfýndıst qaı oblystardan jer alǵanyn jazǵanbyz.