Bıyl 15 jeltoqsanǵa deıin 208 jaıly mektep paıdalanýǵa beriledi
ASTANA. KAZINFORM – 2024 jyldyń 15 jeltoqsanyna deıin 208 jaıly mektep paıdalanýǵa beriledi. Bul týraly Úkimet otyrysynda «Jaıly mektep» ulttyq jobasyn iske asyrý barysyn baıandaǵan Oqý-aǵartý mınıstri Ǵanı Beısembaev aıtty.
«Ulttyq jobaǵa sáıkes mektepter qurylysyn salý jáne olardy ýaqytyly qoldanysqa berý «Samuryq-Qazyna Konstrakshnge», jer ýchaskelerimen jáne ınjenerlik ınfraqurylymmen qamtamasyz etý óńir ákimderine júktelgen. Ótken jyly «Samuryq-Qazyna Konstrakshn» 208 mektepti jobalaýdy jáne salýdy bastady. Astana jáne Almaty qalalarynyń ákimdikteri osy jyly 9 mektepti jeke qurylys salýshylardan satyp alýdy josparlap otyr», - dedi mınıstr.
Onyń atap ótýinshe, jańa oqý jyly bastalǵanǵa deıin 98, al qalǵan 110 nysandy 2024 jyldyń 15 jeltoqsanyna deıin paıdalanýǵa berý josparlanyp otyr.
«Memleket basshysynyń Úkimettiń keńeıtilgen otyrysynda aıtqan synyn eskere otyryp, biz ulttyq jobany sapaly iske asyrýdy qamtamasyz etý úshin bar kúshimizdi salamyz. Ol úshin barlyq memlekettik organdar men uıymdar Ulttyq jobada qoıylǵan naqty mindetterdi sapaly oryndaýy qajet», - dedi Ǵanı Beısembaev.
