Bıyl 1480 km magıstral jóndeýden ótedi — QTJ
ASTANA. KAZINFORM — QTJ jelisinde jyl saıynǵy maýsymdyq jol jumystary júrgizilip jatyr. Bıyl 1480 km magıstral jóndeledi. Ótken jyly osyndaı — 1430 km úlken jumys kólemi atqaryldy. Bul týraly «Qazaqstan temir joly» UK» AQ baspasóz qyzmeti málim etti.
Aýqymdy jol-jóndeý naýqany elimizdiń barlyq óńirlerin qamtıdy.
Búgingi tańda ár túrli jóndeý túrlerimen shamamen 400 km jol jańartyldy. Eldiń ońtústigi men batysynda 100 km astam jol kúrdeli jóndeýden ótti. Jumystar Lepsi — Jasqazaq (Almaty magıstraldyq jeli bólimshesi), Býrylbaıtal — Qarasaı (Jambyl bólimshesi), Áıteke bı — Úıtas (Aqtóbe bólimshesi), 265-rzd. 279-rzd. (Atyraý bólimshesi), 7-rzd. — Saı-Ýtes (Mańǵystaý bólimshesi) aralyqtarynda jalǵasyp otyr.
Keste boıynsha eldiń soltústik jáne shyǵys aımaqtaryndaǵy temirjol magıstralin kúrdeli jóndeýge kiristi. Kúnshash — Qarǵaly (Qostanaı bólimshesi), Bel-Aǵash — Dúısaken (Semeı bólimshesi), Erkinshilik — Edige — Ereımentaý (Pavlodar bólimshesi) ýchaskelerinde jumystar júrgizilip jatyr.
Jalpy, bıyl rels-shpaldyq tordy tolyq aýystyra otyryp, QTJ magıstraldyq jelisiniń 10 bólimshesinde 512 shaqyrymnan astam temirjol jańartylady:
— Aqmola — 63,1 km;
— Qostanaı — 67,3 km;
— Pavlodar — 58,4 km;
— Semeı — 38,6 km;
— Almaty — 29,8 km;
— Jambyl — 52,1 km;
— Qyzylorda — 48,7 km;
— Aqtóbe — 72,6 km;
— Atyraý — 66,7 km;
— Mańǵystaý — 15,7 km.
Sonymen qatar, temirjolshylar joldy saýyqtyrý boıynsha basqa da jumystardy júrgizýde. Bıyl 122 km-ge relstik joltabandy úzdiksiz aýystyryp, 100 km-ge shpaldar tóseledi. Jol mashınalarynyń keshenderi 435 km lastanǵan ballasty tazartady.
Qozǵalys qaýipsizdigin qamtamasyz etý úshin ınfraqurylymdy jańǵyrtý jáne aǵymdaǵy kútip ustaý jónindegi josparly jumystardy júrgizý kezeńinde ýchaskelerde poıyzdardyń qozǵalys jyldamdyǵyna ýaqytsha shekteýler engiziledi. Jyl saıynǵy joldy jóndeý kúzgi-qysqy kezeńde tasymaldaý protsesiniń senimdiligin qamtamasyz etý úshin qajet.
Eske sala keteıik, buǵan deıin Prezıdent «Moıynty – Qyzyljar» baǵytynda jańa temir jol qurylysyn bastaýdy tapsyrǵan edi.