Bıyl 14 jastan asqan qansha balaǵa jumys isteýge ruqsat berildi
ASTANA. KAZINFORM — Elimizde eńbek etýge ruqsat berilgen 14 pen 18 jas aralyǵynda balalar sany 1 mln 700 myń quraıdy. Bul týraly Úkimet otyrysynda Eńbek jáne halyqty áleýmettik qorǵaý mınıstri Asqarbek Ertaev aıtty.
Sonymen qatar Asqarbek Ertaev mınıstrliktiń aqparattyq júıelerinen alynǵan derekter boıynsha búgingi kúni resmı túrde 5 myń 300 oqýshy jumyspen qamtylǵanyn aıtty.
— Jasóspirimderdiń basym bóligi — saýda, oıyn-saýyq jáne demalys qyzmetteri, sondaı-aq qoǵamdyq tamaqtaný salalarynda jumys isteıdi. Bul — olardyń alǵashqy eńbek tájirıbesin meńgeretin baǵyttar. Mamandyqtar boıynsha — kógaldandyrý jumysshylary, kýrerler, daıashylar, satýshy-konsýltanttar, aspaz kómekshileri, anımatorlar bolyp eńbek etedi, — dedi ol.
Sondaı-aq Asqarbek Ertaev 14 jastan bastap 18 jasqa deıingi balalardyń eń kóp sany ońtústik aımaqtarda — Túrkistan (236,6 myń), Almaty (143,5 myń), Jambyl (120 myń) oblystarynda jáne Almaty (161,8 myń), Astana (107 myń), Shymkent (112 myń) qalalarynda tirkelgenin atap ótti.
— Oqýshylar arasyndaǵy eń joǵary jumyspen qamtylý megapolısterde baıqalady. Ol respýblıka boıynsha jumys jasaıtyn balalardyń 59%-yn quraıdy. Sebebi iri saýda, oıyn-saýyq ortalyqtarynyń deni megopolısterde ornalasqan, — dep tolyqtyrdy spıker.
Buǵan deıin 14 jastan bastap jumys isteý úshin neni bilý kerek ekenin jazǵanbyz.
