Qazaqstanda bıyl 13 mln sharshy metrden astam turǵyn úı salyndy
Qazirgi tańda Qazaqstanda ınfraqurylymdy jańǵyrtý jáne óńirlerdi damytý boıynsha aýqymdy jumystar júrip jatyr, dep habarlaıdy Kazinform.
Úkimettiń resmı saıty bul turǵyn úı qurylysy, TKSh jelilerin jańartý, respýblıkanyń kólik-logıstıkalyq áleýetin nyǵaıtý jáne jańa óndiristik kásiporyndardy iske qosýǵa qatysty ekenin jazdy. Bul baǵyttardyń barlyǵy QR Prezıdenti Qasym-Jomart Toqaevtyń «Ádiletti Qazaqstan: bárimiz jáne árqaısymyz úshin. Qazir jáne árdaıym» saılaýaldy baǵdarlamasynda belgilengen.
«2029 jylǵa qaraı 1 mln-nan astam otbasyn jańa baspanamen qamtamasyz etý boıynsha belsendi jumys jalǵasýda. Máselen, 2023 jylǵy 10 aıda 13 mln sharshy metrden astam turǵyn úı salyndy. 2023 jyly óńirlerde ınjenerlik-kommýnıkatsııalyq ınfraqurylym nysandaryn salýǵa 5,4 mlrd teńge bólindi. «Qoljetimdi Internet» ulttyq jobasy bekitildi», — delingen aqparat kózinde.
Sonymen qatar QR kólik-logıstıkalyq áleýetin damytýdyń 2030 jylǵa deıingi tujyrymdamasy bekitildi. Atap aıtqanda, Qazaqstannyń tranzıttik áleýetin edáýir arttyratyn birqatar iri temirjol jobasyn iske asyrý bastaldy.
«Barlyǵy úsh jyl ishinde 1 300 shaqyrymnan astam temirjol salynady. Oǵan qosa 2030 jylǵa deıin 11 myń shaqyrym t/j jóndeý jumystarymen qamtý josparlanyp otyr. Sońǵy kezderi júk tasymalynyń kólemi 2 ese artqan Transkaspıı halyqaralyq kólik baǵytyn damytýǵa birqatar eýropalyq kólik-logıstıkalyq kompanııany tartý boıynsha jumystar júrip jatyr. Qorlardy ulǵaıtý jáne óńirlerdi gazdandyrý jumysyn odan ári jalǵastyrý úshin jańa gaz óńdeý qýattarynyń qurylysy jalǵasýda», — dep jazdy Úkimettiń resmı saıty.
«QazaqGaz» UK» AQ Qashaǵan ken ornynda qýaty jylyna 1 mlrd m3 bolatyn GÓZ qurylysyn júrgizip jatyr. Sondaı-aq Qashaǵan men Qarashyǵanaqta jylyna 6,5 mlrd tekshe metr gaz óńdeıtin jańa GÓZ qurylysy jobalanyp jatyr.
